Time jýrnaly jyl áıelderin atady
ASTANA. KAZINFORM — 2025 jyly tizimge árqaısysy «álemdi ózinshe jaqsyraq jáne ádilirek etýge umtylǵan» 13 áıel kirdi, dep habarlaıdy Time.
— Ár qys saıyn biz jyl áıelderi týraly oı qozǵaý úshin otyrǵanda, ózimizge bir suraq qoıamyz: búgingi kúni álemdegi áıelder men qyzdardyń aldynda turǵan eń mańyzdy máseleler qandaı? Genderlik zorlyq-zombylyq pen áıelderdiń quqyqtaryna shabýyldan bastap klımattyń ózgerýinen týyndaıtyn qaýip-qaterge deıin kóptegen qıyndyqtar bar. Biraq bul qaýipter bar jerde ózgerister úshin kúresetin kóshbasshylar da bar, — dep jazdy Time.
TIME nusqasy boıynsha jyl áıelderi:
· Nıkol Kıdman, aktrısa, prodıýser
· Eıdja Ýılson, basketbolshy
· Djordan Chaılz, gımnast
· Laufey, ánshi
· Rakel Ýıllıs, belsendi, jazýshy
· Jızel Pelıko
· Anna Savaı, aktrısa
· Pýrnıma Devı Barman, bıolog
· Amanda Zýravskı, belsendi
· Fatý Balde, belsendi
· Kler Babıno-Fontenot, Feeding America bas dırektory
· Laýra Modı, Bobbie negizin qalaýshy jáne bas dırektory
· Olıvııa Mann, aktrısa
Jýrnal bıylǵy eki hıkaıa jeke qasiretpen betpe-bet kelip, erekshe áreket jasaǵan qarapaıym áıelderge arnalǵanyn jazdy. Kúzde 72 jastaǵy Jızel Pelıko ózin zorlaý boıynsha sot otyrysyna qatysty. Qupııalylyq boıynsha zańdy quqyǵynan bas tartý týraly sheshimi ony búkil álemde qaharmanǵa aınaldyrdy. Ol Frantsııada jáne odan tys jerlerde ózgeristerge shaqyrdy.
Pelıko sııaqty Amanda Zýravskı de eshqashan belsendi bolamyn dep oılamaǵan. Ol balaly bolýdy asyǵa kútken, biraq asqynýlarǵa baılanysty túsik jasatý kerek boldy.
Alaıda, Tehastyń túsik jasatýǵa tolyqtaı derlik tyıym salýyna baılanysty Zýravskı onyń jaǵdaıy aýyr bolǵansha medıtsınalyq kómek ala almady, saldarynan onyń reprodýktıvti densaýlyǵyna orny tolmas zaqym keldi. Ol 2023 jyly shtatty sotqa berdi, biraq Tehastyń Joǵarǵy soty ótken mamyrda tyıymdy kúshinde qaldyrdy. Endi bul áıel AQSh-taǵy reprodýktıvti quqyqtar qozǵalysynyń kórnekti tulǵasyna aınaldy.
— Bıyl biz problemany kórip, ony sheshýdiń bir bóligi bolýǵa sheshim qabyldaǵan áıelderdi marapattaımyz, — dep jazdy Time.
Aktrısa Olıvııa Mannǵa sút bezi qaterli isigi dıagnozy qoıylǵan kezde, ol áleýmettik jelilerde bul týraly ashyq aıtyp, basqa áıelderdi ózindegi taza mammografııaǵa qaramastan, ony qosymsha tekserýden ótýge ıtermelegen skrınıng quralyn qoldanýǵa shaqyrdy.
Gambııalyq belsendi Fatý Balde úkimettiń áıel jynys múshelerin kesýge tyıym salýdy alyp tastaýdy josparlap otyrǵanyn bilgende, buǵan jol berilmeýi úshin kúsh-jigerin eki eselendirdi.
2017 jyly Nıkol Kıdman Gollıvýdtaǵy kúsh tepe-teńdigin ózgertý qajettigin moıyndap, ár 18 aı saıyn kem degende bir rejısser áıelmen jumys isteýge ýáde berdi. Jýrnal jazǵandaı, osy segiz jyl ishinde ol 19 fılm men telehıkaıaǵa túsip nemese prodıýserlik etti.
Time basylymy ótken jyly áıelder sportta da erekshelengenin jazdy. Gımnast áıel Djordan Chaılz pen WNBA juldyzy Eıja Ýılson Parıj Olımpıadasy qarsańynda dos boldy. Olar áıelder sportyna qyzyǵýshylyqtyń burynǵa qaraǵanda qatty kóbeıgenin jáne 2024 jyly qarjylyq qoldaýdy arttyrýdy talqylaý úshin qaıta kezdesti.
Buǵan deıin Time jýrnaly Donald Trampty jyl adamy ataǵyna laıyq kórgenin jazǵan bolatynbyz.