Time jýrnaly Donald Trampty jyl adamy ataǵyna laıyq kórdi

ASTANA. KAZINFORM – Time jýrnalynyń nusqasy boıynsha jyl adamy ataǵy AQSh-tyń jańadan saılanǵan prezıdenti Donald Trampqa buıyrdy. Short-paraqqa odan basqa Ilon Mask, Keıt Mıddlton jáne ıÝlııa Navalnaıa kirdi, dep habarlaıdy VVS. 

— Time redaktorlary 97 jyl boıy jyl adamyn tańdap keledi: bul sońǵy 12 aıda álemge yqpal ete bilgen, taqyrybymen kóptiń nazaryn aýdara bilgen adamdar. Kóptegen jyldar boıy úzdikterdi tańdaý ońaı bolǵan joq.  2024 jyly tańdaý qıynǵa túsken joq, — dep túsindirdi jýrnaldyń bas redaktory Sem Djeıkobs.

Bas redaktordyń aıtýynsha, popýlızmniń qaıta órkendeýin, ótken ǵasyrdy anyqtaǵan ınstıtýttarǵa senimsizdiktiń taralýyn jáne lıberaldyq qundylyqtar adamdardyń kópshiliginiń ómirin jaqsartady degen senimniń joıylǵanyn baıqaýǵa bolady.

— Tramp bul protsestiń agenti ári benefıtsıary deýge tolyq negiz bar, — dep jazdy Djeıkobs.

Tramptyń AQSh-taǵy prezıdenttik saılaýdaǵy jeńisin kóp jaǵynan tarıhı dep ataýǵa bolady, dep jazdy Time kandıdattardyń qysqasha tizimin tanystyrý kezinde.

Ol el tarıhyndaǵy eń qart prezıdent jáne qylmystyq is boıynsha kináli dep tanylǵan AQSh-tyń jalǵyz basshysy bolmaq.

Tramp AQSh-taǵy prezıdenttik saılaýda alǵash ret jeńiske jetken 2016 jyly Time jýrnalynyń jyl adamy atandy.

Tramptyń jyl adamy atanatynyn buǵan deıin CNN jáne Associated Press aqparat kózderine silteme jasaı otyryp habarlaǵan.