«Tıimdi shartpen qaryz»: Almatyda ınternet-saıtqa qatysty tergeý júrip jatyr
ASTANA. KAZINFORM — Almatyda azamattarǵa krıptovalıýta túrinde qaryz usynǵan saıt tergeýge alyndy.
Qarjylyq monıtorıng agenttiginiń Almaty qalasy boıynsha departamenti prokýratýranyń úılestirýimen Alemcredit.com ınternet-resýrsy arqyly azamattarǵa krıptovalıýta túrinde mıkrokredıt beremiz degen jeleýmen jasalǵan alaıaqtyq deregi boıynsha tergeý júrgizip jatyr.
— Tergeý derekterine sáıkes, yqtımal qaryz alýshylar áleýmettik jeliler arqyly belsendi tartylǵan. Onda tıimdi sharttarmen qaryz beriletini týraly jarnama keńinen taratylǵan. Qaryz rásimdeý úshin azamattardan jeke basyn sáıkestendirý rásiminen ótý, derbes derekterin usyný jáne elektrondyq qujattarǵa qol qoıý talap etilgen. Alaıda atalǵan rásimder aıaqtalǵannan keıin mámileniń naqty sharttary bastapqyda kórsetilgen talaptardan edáýir ózgeshe bolǵan. Qaryz alýshylarǵa ýáde etilgen somadan áldeqaıda az qarajat aýdarylyp, onyń bir bóligi aldyn ala eskertilmegen komıssııalar men ózge de tólemder retinde ustalǵan. Sondaı-aq mámile jasalǵanǵa deıin qaryzdyń tolyq quny, artyq tólem mólsheri, syıaqy men aıyppuldar týraly aqparat tolyq kólemde berilmegen, — deıdi QMA resmı ókili Ernar Taıjan.
Onyń sózinshe, qarajat úshinshi tulǵalardyń, ıaǵnı dropperlerdiń bank kartalary arqyly qaıtarylǵan.
— Internet-resýrstyń jumysyn qamtamasyz etý jáne qaryz alýshylarmen baılanys ornatý úshin zańdy tulǵalardy, telekommýnıkatsııalyq resýrstar men tehnıkalyq quraldardy qamtıtyn tarmaqtalǵan ınfraqurylym paıdalanylǵan. Tintý barysynda jappaı SMS-habarlama taratýǵa qoldanylǵan SIM-bokstar men kóp mólsherde SIM-karta tárkilendi. Tergeý jalǵasyp jatyr. QR Qylmystyq-protsestik kodeksiniń 201-babyna sáıkes ózge aqparat jarııa etilmeıdi, — dep túıindedi vedomstvonyń resmı ókili.
Buǵan deıin alaıaqtar 4 kúnde 150 myń SMS taratyp, azamattardyń aqshasy men jeke deregin ıemdenbek bolǵanyn jazdyq.
