Tym ystyq shaı men kofe óńesh obyrynyń qaýpin arttyrýy múmkin
ASTANA. KAZINFORM – Oksford ýnıversıtetiniń ǵalymdary ystyq sýsyndardyń temperatýrasy men olardy tutyný jıiliginiń óńesh obyrynyń damý qaýpimen baılanysyn zerttedi. Bul týraly QR Densaýlyq saqtaý mınıstrligi habarlady.
Zertteý barysynda 1 mıllıonǵa jýyq adamnyń derekteri taldanǵan. Nátıjeler kórsetkendeı, ishilgen sýsynnyń mólsheri ǵana emes, onyń temperatýrasy da mańyzdy. Óte ystyq sýsyndardy unatatyn adamdarda óńeshtiń jalpaq jasýshaly obyrynyń damý qaýpi jyly sýsyn ishetindermen salystyrǵanda 3 eseden astam joǵary bolǵan.
Kúnine alty nemese odan da kóp kese ystyq sýsyn ishý obyrdyń osy túriniń damý qaýpiniń 71%-ǵa artýymen baılanysty bolǵan. Sonymen qatar shaı men kofeni tutynýdyń arasynda aıtarlyqtaı aıyrmashylyq anyqtalmaǵan.
Ǵalymdardyń paıymdaýynsha, negizgi róldi suıyqtyqtyń joǵary temperatýrasy atqarýy múmkin. Óıtkeni ol óńeshtiń shyryshty qabyǵyn zaqymdaýy yqtımal. Bul kúndelikti ádetterimiz úshin neni bildiredi? Súıikti shaıyńyzdan nemese kofeńizden bas tartýdyń qajeti joq. Eń bastysy — sýsynnyń sál salqyndaýyn kútip, aýyz kúıdiretindeı ystyq kúıinde ishpeý.
Densaýlyqqa qamqorlyq qarapaıym ádetterden bastalady. Keıde ishetin sýsynnyń ózin emes, onyń temperatýrasyn ózgertý jetkilikti.
AQSh ǵalymdary kofeniń qartaıýdy baıaýlatýǵa yqtımal paıdasyn túsindirgen edi.
