Tym bolmasa bir medal — Qysqy Olımpıadaǵa mınıstr boljamy qandaı

ASTANA. KAZINFORM — Keler jyly Italııada ótetin qysqy olımpıada oıyndaryna Qazaqstannan 35 sportshy barady. Bul rette Týrızm jáne sport mınıstri Erbol Myrzabosynov jarys nátıjesine qandaı boljam jasap otyrǵanyn aıtty.

Mınıstrdiń aıtýynsha, 1994 jyldan beri 8 qysqy Olımpıada ótken jáne onda bes sportshymyz ǵana medal alǵan. 

— Ókinishke oraı, 2018 jyldan beri birde-bir medal joq. Sondyqtan biz sol bir medaldi alý úshin barymyzdy salyp jatyrmyz. Ǵylymı turǵyda daıyndyq ádistemeler, mamandar tartyp, sol baǵyttyń bárin kúsheıtip jatyrmyz. Árıne munyń bári jasalsa da, jeke sol bir sátte barlyǵy sportshynyń emotsıonaldyq kúıine, psıhologııalyq kúıine, densaýlyǵyna baılanysty bolady. Biraq búgingi kúni mınıstrlik ákimdiktermen, federatsııalarmen birlesip, kópten bolmaǵan medaldi alýǵa áreket etip jatyrmyz, — dep jaýap berdi Sport mınıstri Úkimette ótken brıfıngte.

Osyǵan deıin Qysqy Olımpıadaǵa daıyndyqqa 13,3 mlrd teńge bólingeni týraly jazdyq.