Tilshiler jemqorlyqqa qarsy. Baıqaý nátıjesi jarııalandy
ORAL. QazAqparat - Oralda buqaralyq aqparat quraldary arasyndaǵy «Parasyz bolashaqqa. Birge!» oblystyq shyǵarmashylyq baıqaýy qorytyndylandy, dep habarlaıdy «QazAqparat» tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamenti «Nur Otan» partııasynyń jáne «Jańarý» jemqorlyqqa qarsy jalpyulttyq qozǵalysynyń oblystyq fılıaldarymen birlesip uıymdastyrǵan dástúrli baıqaýǵa 33 jýrnalıst qatysyp, baq synady.
Shara barysynda departament basshysy, Ádep jónindegi keńes tóraǵasy Bolat Isaqov BUU-nyń bastamasymen atalyp ótilip kele jatqan Halyqaralyq sybaılas jemqorlyqqa qarsy kúres kúniniń mán-mańyzyna toqtaldy. Elimizde arnaıy qabyldanǵan strategııanyń nátıjesinde sybaılas jemqorlyqtyń aldyn alý baǵytyndaǵy keń kólemdi sharalar óz jemisin bere bastady. Muny áleýmettik saýalnamalar men halyqaralyq sarapshylar da rastaýda. Mysaly, qarasha aıynda Vashıngtonda ótken kezdesýde halyqaralyq uıymdar Qazaqstandaǵy sybaılas jemqorlyqqa qarsy saıasattyń qazirgi zamanǵy talaptarǵa saı keletinin atap ótti. Elbasy «Bolashaqqa baǵdar: rýhanı jańǵyrý» baǵdarlamalyq maqalasynda sanadaǵy ózgeristi ár adamnyń ózinen bastaý kerektigin atap ótkeni belgili. «100 naqty qadam» ult josparyna sáıkes memlekettik organdardyń ashyqtyǵy men jarııalylyǵyn qamtamasyz etý baǵytynda tıisti jumystar atqarylýda. Memlekettik qyzmet kórsetý salasynda jemqorlyqty joıý boıynsha aýqymdy jumystar júrgizilýde. Qazirgi tańda memleketten qyzmetterdiń 47 paıyzy onlaın túrde kórsetiledi. Osy oraıda kásipkerlerge barlyq lıtsenzııalar men ruqsatnamalar tek elektrondy túrde beriledi. Aldaǵy úsh jylda memleketten kórsetiletin qyzmetterdiń 80 paıyzy onlaın tártibimen qoljetimdi bolmaq. Memlekettik qyzmet merıtokratııa qaǵıdasyna negizdelip, jańa turpatta jumys jasalýda. Úsh satyly konkýrstyq irikteý men mansaptyq úlgi engizildi. Nátıjesinde memlekettik qyzmetke qaıta kelýshiler sany úsh esege ósti. Al kadr aýysýshylyǵy - 2, laýazym aýystyrý sany 18 esege azaıdy.
Baıqaý qorytyndysynda «Jaıyq Press» JShS Jánibek aýdandyq «Shuǵyla» gazetiniń tilshisi Meńdigúl Fazylova «Oblystyq, qalalyq jáne aýdandyq basylymdaǵy memlekettik tildegi úzdik materıal», oblystyq «Prıýrale» gazetinen Janna Balyqova «Oblystyq, qalalyq jáne aýdandyq basylymdaǵy orys tilindegi úzdik materıal» atalymy boıynsha jeńimpaz atandy.
Sol sekildi J.Dosmuhamedov atyndaǵy Oral pedagogıkalyq kolledji dırektorynyń orynbasary Sandýǵash Sádýaqasqyzy «Memlekettik tildegi úzdik beınerolık», oblystyq radıonyń tilshileri Gúljaz Badelova men Nına Pavlycheva «Memlekettik tildegi úzdik radıohabar» jáne «Orys tilindegi úzdik radıohabar» atalymy boıynsha úzdik shyqty.
Aýdandyq deńgeıdegi memlekettik organdar arasynda Jańaqala aýdandyq ishki saıasat bólimi «BAQ-pen baılanystaǵy úzdik áriptes» retinde tanylyp, arnaıy júldege ıe boldy. Sonymen qatar qoǵamda sybaılas jemqorlyqqa qarsy mádenıet qalyptastyrýda belsendi qyzmet etken birqatar mekeme-uıymdar basshylaryna QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamenti basshysynyń alǵys hattary tabys etildi.
