Tilge qatysty máselelerdi saıasılandyrýǵa jol berilmeýi kerek - Erlan Qarın

NUR-SULTAN. QazAqparat – Memlekettik tildiń barlyq salalarda básekege qabilettiligin arttyrý úshin utqyr ádiske kóshý qajet. Sondaı-aq eldiń birligi men qoǵamdyq tártipke kesirin tıgizýi múmkin tilge qatysty sezimtal máselelerdi saıasılandyrýǵa esh jol berilmeýi kerek. Bul týraly Memlekettik keńesshi Erlan Qarın óziniń Youtube arnasynda aıtty, dep habarlaıdy QazAqparat tilshisi.

«Qoǵam azamattyq jaýapkershilikti damytýy, jalań urandarǵa jáne saıası avantıýrızmge urynbaýy, radıkalızm men ekstremızmniń kez-kelgen túrine qarsy turýy kerek. Bul qoǵamdyq shart ulttyń jańa sapasyn kózdeıtin jańarǵan, jalpyulttyq qundylyqtarǵa negizdeledi. Jańa qundylyqtardyń ózegi - eńbekqorlyq, eńbek adamyna qurmet, kásibı mamannyń abyroı-bedeli, qarapaıymdylyq, únemshildik jáne árqashan bilim-biliktilikti arttyrýǵa umtylý sııaqty qasıetter bolmaq. Osy qundylyqtarǵa basymdyq berý arqyly biz ult sapasyn jańa deńgeıge kótere alamyz. Taǵy bir mańyzdy qundylyq - memlekettik tildi odan ári damytý. Bul rette ony barlyq salalarda básekege qabilettiligin arttyrý úshin utqyr ádiske kóshý qajet. Sondaı-aq eldiń birligi men qoǵamdyq tártipke kesirin tıgizýi múmkin tilge qatysty etnosaralyq qatynas jáne basqa da sezimtal máselelerdi saıasılandyrýǵa esh jol berilmeýi kerek», – dedi Memlekettik keńesshi.

Erlan Qarın bul jumys baǵyttarynan bólek, Ulttyq quryltaıdyń mańyzdylyǵyna toqtaldy. Memlekettik keńesshiniń aıtýynsha, quryltaı qoǵamdyq talqylaý arqyly el taǵdyryna yqpal etetin uzaqmerzimdi strategııalyq sheshimderdi qabyldaıtyn ınstıtýt bolady.

Eske sala keteıik, buǵan deıin Erlan Qarın Ulttyq quryltaı negizge alatyn úsh qundylyqty týraly aıtqan bolatyn.