Tileýhan Ábildaev Almatyda koronavırýs juqtyrǵan 6 adamnyń jaǵdaıy týraly aıtyp berdi
NUR-SULTAN. QazAqparat – Almaty qalasynyń densaýlyq saqtaý basqarmasynyń basshysy Almatyda koronavırýs juqtyrǵan 6 adamnyń jaǵdaıy týraly aıtyp berdi, dep habarlaıdy QazAqparat tilshisi.
«Almaty qalasyndaǵy aýrýhanalarda koronavırýs juqtyrǵan 6 adam jatyr. Buǵan deıin habarlanǵandaı, Germanııadan kelgen úsh patsıent bar. Tórtinshisi Máskeý-Almaty reısimen keldi. Qazirgi ýaqytta tórt patsıenttiń jaǵdaıy qanaǵattanarlyq. Ekeýiniń jaǵdaıynyń aýyrlyǵy ortasha. Olardyń bári bekitilgen hattamaǵa sáıkes em alýda. Der kezinde vırýsqa qarsy jáne sımptomatıkalyq terapııa bastaldy», - dedi Tileýhan Ábildaev «Habar 24» arnasynan berilgen onlaın rejimdegi baspasóz máslıhatynda.
Eske sala ketsek búgin saǵat 13.00-de «Habar 24» arnasynda onlaın rejimde Densaýlyq saqtaý mınıstri Eljan Birtanov Qazaqstanda koronavırýs ınfektsııasyn juqtyrǵandardyń sany 8-ge jetkenin habarlaǵan edi.
Aıta ketsek búgin Qazaqstan Respýblıkasynda tótenshe jaǵdaı engizildi. Bul týraly Jarlyqqa QR Prezıdenti qol qoıdy.
Jarlyqqa sáıkes oıyn-saýyq ortalyqtarynyń, kınoteatrlar men teatrlardyń jumysy toqtatylyp, Qazaqstan Respýblıkasyna keletin halyqaralyq uıymdar delegatsııalarynyń múshelerin qospaǵanda el aýmaǵyna kóliktiń barlyq túrlerimen kirýge, sondaı-aq onyń aýmaǵynan shyǵýǵa shekteýler belgilendi.
