Tilendıev atyndaǵy mýzykalyq mekteptiń jekege ótýi: Batalov pikir bildirdi
NUR-SULTAN. QazAqparat - Almaty oblysynyń ákimi Amandyq Batalov Taldyqorǵandaǵy Nurǵısa Tilendıev atyndaǵy mýzykalyq mekteptiń jekege ótýine qatysty pikir bildirdi, dep habarlaıdy QazAqparat tilshisi.
«Mektepter jekemenshikke berilmeıtinin kim aıtty? Ázirge eshkimge berilgen joq. Tek (N. Tilendıev atyndaǵy saz mektebi - red.) senimgerlik basqarýǵa berilýde. Jumystar áli júrip jatyr. Sheshim áli qabyldanǵan joq», - dedi Amandyq Batalov búgin elordadaǵy Ortalyq kommýnıkatsııalar ortalyǵynda ótken brıfıngte.
Óńir basshysynyń aıtýynsha, óner ordasy jeke kásipkerge senimgerlik basqarýǵa berilgennen keıin, qural-jabdyqtar jańalanyp, ustazdardyń jalaqysyn kóterý syndy máseleler de sheshimin tabady.
Esterińizge sala keteıik, Almaty oblysynda Nurǵısa Tilendıev atyndaǵy saz mektebiniń ustazdary mekemeniń jekege ótkenin bilmeı qalǵanyn aıtyp, narazylyq bildirgen bolatyn. Olardyń sózinshe, mekeme dırektory senimgerlik basqarýǵa berý sheshimin ujymmen aqyldaspaı qabyldaǵan. Ustazdar óner ordasy jekeniń qolyna ótkennen keıin, tólem aqysy birden kóterilip, talantty balalardyń úıirmelerge qatysýǵa múmkindikteri bolmaı qalatynyna alańdaýly. Artynsha muǵalimder de jumyssyz qalatynyna boljam jasap otyr.
Foto: zhetysu.gov.kz
