Tilderdi qoldaný men damytýdyń aldaǵy 10 jylǵa arnalǵan baǵdarlamasynda qazaq tilin bilý mindettelmegen - Májilis depýtaty
ASTANA. Qyrkúıektiń 3-i. QazAqparat /Marlan Jıembaı/ - Aldaǵy 10 jylǵa arnalǵan tilderdi qoldaný men damytý baǵdarlamasynda qazaq tilin bilýdi mindetteý degen joq. Bul týraly búgin elorda ákimdiginde Tilderdi qoldaný men damytýdyń 2011-2020 jyldarǵa arnalǵan memlekettik baǵdarlama jobasyn qoǵamdyq talqylaýda QR Parlamenti Májilisiniń depýtaty Aldan Smaıyl aıtty.
«Til úırenýdi mindetteý degen joq. Biz ony mindettemeıtin bolsaq, qazaq tilin qalaı qoldanysqa engizemiz? Mindetteıtin jerde til bilýdi mindetteý kerek. Atqarý bıligine, atqarýshy oryndarǵa, atqarý oryndarynyń basshysy bolyp otyrǵan adamdarǵa tildi bilýdi mindetteıtin ýaqyt jetti», degen halyq qalaýlysy baǵdarlamany túzý barysynda doktrınany negizge aldyq degen dáıekke toqtaldy.
«Doktrınada til mindetteledi. Endeshe nege baǵdarlamany doktrınaǵa sáıkes jasamadyq? Doktrınada kerek bolatyn bolsa, qazaq tilin bilmeıtin bolsa azamattyq bermeý jóninde másele bar. Ol baǵdarlamada nege joq?», dedi A.Smaıyl.
Sondaı-aq depýtat atalǵan qujat 10 jylǵa arnalǵan baǵdarlama bolǵandyqtan, qazaq tilin bilýge tıisti qyzmetterdi de aıqyndaý qajettigin basa aıtty. «Máselen, buqaramen jáne Qazaqstan Respýblıkasynyń memlekettik bıliginde jumys istegiń kelse, qazaq tilin bilýiń kerek degen sózdi osy kúnge deıin nege aıtpaımyz», degen depýdat tilge degen qajettilik osydan bastalatyndyǵyn qadap aıtty.
