Tilderdi damytýdyń respýblıkalyq úılestirý-ádistemelik ortalyǵy jyl aıaǵyna deıin qaıta qurylyp, jańa sapamen jumys isteıtin bolady

Búgin Astanada «Respýblıkadaǵy memlekettik tildi úıretý ortalyqtarynyń jumysyn júıege túsirýdiń uıymdastyrýshylyq jáne ádistemelik máseleleri» taqyrybynda ótken ǵylymı-praktıkalyq konferentsııa barysynda Til komıtetiniń tóraǵasy Sherýbaı Qurmanbaıuly osylaı málim etti.

Komıtet tóraǵasynyń aıtýynsha, aldaǵy ýaqytta memlekettik tildi oqytý ortalyqtarynyń qyzmetin reıtıngtik baǵalaý júıesin engizý jáne onyń quqyqtyq negizi men ádisnamasyn ázirleý kózdeledi. Budan bólek, memlekettik tildi oqytý úderisin yntalandyrý jáne monıtorıng júrgizý baǵytynda da birqatar jumystar josparlanǵan. «Bul baǵytta arnaıy júıe qurylady. Memlekettik tildi meńgerý deńgeıine qoıylatyn talaptarǵa quqyqtyq bazany ázirleý de kózdeledi. Sonymen qatar, oqytýdyń ınnovatsııalyq túrleri men ádistemelerin ázirleý arqyly qazaq tilin qashyqtyqtan oqytýdy keńinen engizýge de bolady», - deıdi Sh. Qurmanbaıuly.

Onyń aıtýynsha, aldaǵy ýaqytta Sh. Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵynyń jumysyn ǵylymı-ádistemelik turǵydan, ǵylymı áleýet turǵysynan jetildire túsý kózdeledi. «Respýblıkalyq ortalyqtar óz deńgeıinde jumysyn júrgizse, onda aımaqtardaǵy ortalyqtardyń jumys sapasyn da osyǵan oraılastyryp, retteı alamyz. Osy maqsatta Sh. Shaıahmetov atyndaǵy Tilderdi damytýdyń respýblıkalyq úılestirý-ádistemelik ortalyǵynyń qurylymyn, quqyqtyq mártebesin sapaly jetildirýdiń naqty sharalary bastalyp ketti. Úkimetke arnaıy hat ta joldandy», - deıdi Sh. Qurmanbaıuly. Onyń aıtýynsha, atalǵan ortalyq jyl sońyna deıin qaıta qurylyp, onyń jumysyna bilikti mamandar, ǵalymdar tartylady. Bul rette respýblıkalyq ortalyq óńirlik ortalyqtardyń jumystaryn úılestirip, ozyq tájirıbelerdi óńirlerge engizýge, ınnovatsııalyq ádistemelerdi taratýǵa da septigin tıgizetin bolady. «Jyl sońyna deıin ortalyqtyń mártebesi anyqtalyp, qaıta qurylatyn bolsa, óńirdegi ortalyqtardyń da jumysyn birizdendirý, standarttaý da jeńil tımek. Respýblıkalyq ortalyq óziniń atyna saı bolýy kerek. Sol úshin biz ortalyqtyń qasynan ádistemelik keńes qurýdy da oılastyryp otyrmyz. Onyń quramynda óńirlerden usynylǵan tańdaýly mamandar jumys isteıtin bolady», - deıdi Sh. Qurmanbaıuly.