Tilderdi damytý baǵdarlamasy memlekettik saıasatta mańyzdy ról atqardy - M. Qul-Muhammed
ANA. 6 maýsym. QazAqparat /Qanat Mámetqazyuly/ - Tilderdi damytý baǵdarlamasy memlekettik saıasatta mańyzdy ról atqardy. Bul týraly búgin QR Parlamenti Májilisinde ótken Úkimet saǵatynda Mádenıet mınıstri Muhtar Qul-Muhammed málim etti.
«Til saıasaty salasyndaǵy 2010 jyldyń basty qorytyndysy 2001-2010 jyldarǵa arnalǵan tilderdi damytý men qoldanýdyń memlekettik baǵdarlamasyn iske asyrýdy aıaqtaý men kelesi onjyldyqqa jańa baǵdarlama ázirleý boldy. Alǵashqy uzaq merzimdi tildik baǵdarlama sol ýaqyttaǵy qalyptasqan tarıhı shyndyq aıasynda ázirlenip, júzege asqan bolatyn. Onyń tıimdiligi jóninde ártúrli pikir, daý-damaılar bar. Alaıda sonyń ózinde baǵdarlama nátıjesi memlekettik tildi oqytý ınfraqurylymyn aıtarlyqtaı arttyrdy. Máselen, osydan 5 jyl buryn Oqytý ortalyqtarynyń sany 8 bolsa, qazir júzden astam ortalyqtar jumys isteıdi. Olardyń jartysynan astamy memlekettik», - dedi M. Qul-Muhammed.
Onyń aıtýynsha, baǵdarlama júzege asqaly beri qazaq tilindegi balabaqshalar sany aıtarlyqtaı ósken. Atap aıtqanda, on jyl ishinde olardy sany 68 paıyzǵa, al qazaq mektepteriniń sany 173 birlikke ósken. «Búginde elimizdegi 7,5 myń mekteptiń 3 myń 821-inde taza qazaq tilinde bilim beriledi. Al elimiz táýelsizdik alǵan kezde qazaq mektepterinde oqıtyn balalar sany 32 paıyzdy qurasa, qazir ol kórsetkish eki esege artyp, 1,5 mln.-nan astam bala qazaq mektepterinde bilim alady», - dedi mınıstr.
