Tilder onkúndigi: Aqmolada 40-qa jýyq shara ótkiziledi
KÓKShETAÝ. QazAqparat - Qazaqstan halqynyń tilderi kúnine oraı Aqmola oblysynda tilder onkúndigi bastaldy. Bul týraly óńirlik kommýnıkatsııalar qyzmetinde ótken brıfıngte oblystyq tilderdi damytý basqarmasynyń basshysy Maral Jaqypova aıtty, dep habarlaıdy QazAqparat tilshisi.
«Jyl saıyn ótkiziletin tilder onkúndigi bıyl qyrkúıek aıynyń 5-18 kúnderi aralyǵyna josparlanyp otyr», dep atap ótti M.Jaqypova. - «Qyrkúıektiń 5-i kúni qazaqtyń ulttyq qoǵamdyq-saıası qaıratkeri Ahmet Baıtursynovtyń týǵan kúni. Sol sebepti jyl saıyn dástúr boıynsha osy kúni tilder onkúndigi bastaý alady. Onkúndik sheńberinde oblysta dóńgelek ústel, baıqaý, ádebı-sazdy keshter, shyǵarma jáne sýret baıqaýlary tárizdi 40-qa jýyq shara ótkizý josparda bar. Jalpy, jyldan jylǵa sharanyń aıasy keńeıip keledi».
Atqarylǵan sharýalar jáne aldaǵy josparlary týraly Qazaqstan halqy Aqmola assambleıasy hatshylyǵynyń meńgerýshisi Rınat Galıamov aıtyp berdi. Onyń sózinshe, qazaq tilinde ashyq dıktant ótkizý boıynsha daıyndyq jumystary júrgizilýde. Oǵan kez kelgen adam qatysa alady. Sondaı-aq, ózge ult ókilderi arasynda «Týǵan jer» án baıqaýy uıymdastyrylsa, kıeli oryndarymen tanymal Ereımentaý jáne Qorǵaljyn aýdandarynda taqyryptyq sharalar ótkizý josparda bar.
