Tilder festıvali aıasynda «Tili birdiń - tilegi bir» atty jastar forýmy ótedi
ASTANA. Tamyzdyń 23-i. QazAqparat /Qanat Mámetqazyuly/ - Búgin, tamyzdyń 23-inde bastalǵan Qazaqstan halqy tilderiniń HІІ qalalyq festıvaliniń aıasynda elimizde turatyn ózge ult ókilderiniń «Tili birdiń - tilegi bir» atty respýblıkalyq jastar forýmy ótedi dep josparlanýda.
Bul týraly búgin atalmysh sharaǵa oraı baspasóz máslıhatyn ótkizgen Astana qalasy Tilderdi damytý basqarmasynyń bastyǵy Orazgúl Asanǵazy málim etti.
«Bekitilgen josparǵa sáıkes, erekshe atap ótýge turarlyq shara qyrkúıektiń 20-21 kúnderi «Tili birdiń - ıilegi bir» atty respýblıkalyq jastar forýmy ótedi. Buǵan elimizdiń túkpir-túkpirinde turatyn, qazaqshaǵa jetik, memlekettik tildi erkin meńgergen jastar qatysady. Budan bólek, jyl saıynǵy dástúr boıynsha «Taǵzym men taǵylym» atty shara boıynsha elordadaǵy Baýyrjan Momyshuly, Jánibek pen Kereı han, Kenesary han eskertkishterine babalar rýhyna taǵzym etiledi», dedi O. Asanǵazy. Budan bólek, shara barysynda qala aýmaǵynda ornalasqan ár mekeme ózderi ornalasqan kóshe ataýlarynyń mán-mazmunyna úńilip, turǵyndardyń tanymyn arttyratyn is-shara uıymdastyrýdy qolǵa alady.
«Tilder festıvali ýaqyt ozǵan saıyn aýqymyn keńeıtip, sany da sapasy da artyp keledi. Jalpy, aǵymdaǵy jyly bir aı boıy Astanada ótetin bul ıgi sharadan bas qaladaǵy birde-bir mekeme tys qalmaıdy», dedi basqarma tóraıymy.
