Til jáne jańa álipbı máselesinde qatelikke jol berýge bolmaıdy - Nyǵmatýlın

ASTANA. QazAqparat - Latyn álipbıine kóshý máselesinde eshqandaı qatelik bolmaýy kerek. Bul týraly Parlament Májilisiniń tóraǵasy Nurlan Nyǵmatýlın málim etti, dep habarlaıdy QazAqparat.

«Barshańyzǵa málim, qazirgi ýaqyt ol búkil álemde aqparat tehnologııalarynyń joǵary deńgeıde damýynyń kezeńi. Sondyqtan bizdiń memleketimizde zamanǵa saı «Tsıfrlyq Qazaqstan» baǵdarlamasy júzege asyrylyp jatyr. Elbasymyzdyń tapsyrmasyna sáıkes, barlyq bilikti mamandar birneshe jyldyń ishinde latyn qarpi boıynsha qazaq álipbıiniń jańa jobasyn jasady. Eń bastysy - jańa álipbı barlyq talaptarǵa saı bolsa, biz bıik tehnologııalardy meńgerýge, ınternetke, ǵylym men bilimge jáne álemdik damýǵa erkin kiretin bolamyz. Bul bolashaq urpaq aldyndaǵy bizdiń úlken paryz jáne olarǵa qaldyratyn máńgilik mura. Sondyqtan latyn jazýyna kóshý - zor múmkindik pen óte úlken jaýapkershilik. Sol úshin bizdiń úshinshi sessııadaǵy alǵashqy parlamenttik tyńdaý da Elbasynyń tarıhı bastamasyna arnalyp otyr», - dedi Májilis tóraǵasy «Memlekettik tildiń latyn grafıkasyndaǵy álipbıiniń biryńǵaı standartyn engizý máseleleri týraly» parlamenttik tyńdaýda.

Osy oraıda N. Nyǵmatýlın parlamenttik tyńdaýǵa jańa álipbıdi jasaǵan avtorlar arnaıy shaqyrtylǵanyn, sondaı-aq olar bul joba tanystyrylatynyn atap ótti.

«Búgin biz jańa álipbıdi jan-jaqty talqylap, árbir áripti, ár tańba men belgini tereń taldaýymyz qajet. Sebebi til, jańa álipbı máselesinde eshqandaı qatelik bolmaýy kerek», - dep túıindedi sózin ol.

Aıta keteıik, parlamenttik tyńdaýda jańa álipbı nusqasy negizinde Sh.Shaıahmetov atyndaǵy respýblıkalyq ortalyq qyzmetkerleri jáne syrttan shaqyrylǵan turǵyndar arasynda birneshe ret aprobatsııa júrgizilgenin aıtty. Bul jaıynda atalǵan ortalyqtyń dırektory Erbol Tileshov baıandap berdi.