Til úıretý ortalyqtarynyń ókilderi Astanada bas qosty
ASTANA. Jeltoqsannyń 23-i. QazAqparat /Gúlnár Jandaǵulova/ - Qazaqstannyń barlyq óńirlerindegi til úıretý ortalyqtarynyń ókilderi búgin Astanada bas qosty. Olar halyqqa memlekettik tildi oqytýdyń jedel jáne ońtaıly ádisterin talqylaýda.
Sharany uıymdastyrýshy - Sh.Shaıahmetov atyndaǵy Tilderdi damytý jónindegi respýblıkalyq úılestirý-ádistemelik ortalyǵynyń aıtýynsha, bul basqosýdy ótkizýdegi maqsat - ádisterdi ıgerý jáne memlekettik tildi oqytýdy qalaı jetildirýge bolatynyn túsiný, sondaı-aq oblystardaǵy til úıretý ortalyqtarynyń jumys tıimdiligin arttyrý jáne 2010 jyldyń jumystaryn josparlaý.
Atalmysh shara Elbasy N.Nazarbaevtyń Qazaqstan halqy Assambleıasynyń XV sessııasynda aıtylǵan «memlekettik tildi oqytý ortalyqtary jelisin keńeıtý, ár qalada jáne ár aýdan ortalyǵynda, joǵary oqý oryndary men basqa da mekemelerde osyndaı oqý ortalyqtaryn ashý týraly» tapsyrmasynyń aıasynda ótkizilip otyr.
Konferentsııaǵa ózara tájirıbeler men ádistemeler almasý úshin oqý ortalyqtarynyń basshylary men ádisker-oqytýshylary shaqyrylyp otyr. Shara Mádenıet jáne aqparat mınıstrligi Til komıtetiniń qoldaýymen uıymdastyryldy.
