«Til - tutastyq kepili» atty respýblıkalyq vedomstvoaralyq baıqaý jeńimpazdary marapattaldy

ASTANA. QazAqparat - Búgin «Qazmedıa ortalyǵy» ǵımaratynda Bas prokýratýranyń bastamasymen jáne Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń qoldaýymen quqyq qorǵaý, arnaıy jáne áskerı organdar arasynda «Til - tutastyq kepili» atty respýblıkalyq vedomstvoaralyq baıqaý ótti.

Ótkizilip otyrǵan is-sharanyń maqsaty - ulttyń birligi men tutastyǵyn jáne qoǵamdyq kelisimdi nyǵaıtý, qazaqstandyq patrıotızmge tárbıeleý, sonymen qatar quqyq qorǵaý jáne basqa da memlekettik uıymdar qyzmetkerleriniń arasynda memlekettik tildiń mártebesi men mańyzyn keńinen nasıhattaý.

Bul memlekettik tildi odan ári damytýǵa, sonymen qatar barsha qazaqstandyqtardy ult retinde biriktirip, el bolashaǵynyń irgetasyn bekemdeı túsýge baǵyttalǵan shara.

Baıqaýǵa Joǵarǵy Sot, Bas prokýratýra, Memlekettik qyzmet isteri jáne sybaılas jemqorlyqqa qarsy is-qımyl agenttigi, Memlekettik kúzet qyzmeti, Qorǵanys mınıstrligi ókilderinen quralǵan komandalar qatysyp, saıysty báıgege tústi.

Memlekettik tildi meńgergendikteriniń joǵary deńgeıin jáne ony kásibı qyzmette qoldaný daǵdylaryn kópshilik talqysyna usynǵan baıqaýǵa qatysýshylar sheshendik ónerdegi sheberlikterin de synǵa saldy.

Baıqaýdyń bir kezeńi Qazaq handyǵynyń 550 jyldyǵyna arnaldy, onda óner synasqan qatysýshylar elimizdiń tarıhy men mádenıetin tereń biletindikterin jáne ata-babadan mura bolyp kele jatqan salt-dástúr, ádet-ǵuryptardy joǵary deńgeıde meńgergenderin pash etti.

Baıqaýdyń qorytyndysy boıynsha anyqtalǵan jeńimpazdar baǵaly syılyqtarǵa ıe bolyp, alǵys hattarmen marapattaldy, dep habarlaıdy Bas prokýratýranyń baspasóz qyzmeti.