Til týraly zań men baǵdarlama til talabynyń jańa deńgeıine sáıkes jetildirilýi tıis - A. Smaıyl
ASTANA. 20 sáýir. QazAqparat /Qanat Mámetqazyuly/ - Til týraly zań men baǵdarlama til talabynyń jańa deńgeıine sáıkes jetildirilýi tıis.
Búgin QR Parlamenti Májilisiniń jalpy otyrysynda Úkimet basshysynyń atyna joldaǵan saýalynda depýtat Aldan Smaıyl osylaı málimdedi.
«Elbasy N. Nazarbaev memlekettik tildiń, ıaǵnı qazaq tiliniń qoldaný aıasyn keńeıtýdiń jańa kezeńinde qol jetkizetin mejeni belgilep berdi. Qazaq tilin 2017 jyly halyqtyń 80, 2020 jylǵa qaraı 95 paıyzy ıgerip, endigi 10 jylda mektep túlekteriniń 100 paıyzy osy tilde erkin sóıleýi kerek. Bul mártebeli kórsetkishke qalaı qol jetkizemiz. Eldi oılandyryp otyrǵan saýal osyndaı», - deıdi Aldan Smaıyl. Onyń aıtýynsha, qoldanystaǵy «Til týraly» zań da, aldaǵy 10 jylǵa qabyldanǵan baǵdarlama da dál qazirgi deńgeıinde Prezıdent alǵa qoıyp otyrǵan talapty dáıekti júzege asyrýǵa tolyq múmkindik týǵyzýǵa tıis. Alaıda depýtat osy eki qujat ta memlekettik tildiń jańa deńgeıine sáıkes jetildirýdi qajet etetinin alǵa tartady. «Naqtyraq aıtsaq, olar endigi ýaqytta qostildilikten birtildilikke baıyppen, respýblıkadaǵy tilderge qajettilik eskerile otyryp, zań arqyly kóshýdiń quqyqtyq negizine aınalýy shart. Sondyqtan da, biz Ádilet, Mádenıet, Eńbek jáne halyqty áleýmettik qorǵaý, Baılanys jáne aqparat mınıstrlikteri men memlekettik til saıasaty jónindegi komıssııa «Til týraly» zańǵa tıisti ózgerister men tolyqtyrýlar engizip, Parlamentke osy jyldyń ishinde usynýǵa tıis dep esepteımiz», - dedi A. Smaıyl.
