Til tıgizgeni úshin jazany alyp tastaý: Ádilet vıtse-mınıstri pikir bildirdi

ASTANA. QazAqparat - Ádilet vıtse-mınıstri Alma Muqanova Qylmystyq kodeksten Nursultan Nazarbaevqa til tıgizgeni úshin jazaǵa tartýdy kózdeıtin 373 jáne 374-baptardy alyp tastaýǵa qatysty pikir bildirdi, dep habarlaıdy QazAqparat tilshisi.

Bul másele aktıvterdi qaıtarý týraly zańǵa ilispe qujatta eskerilgen. Onyń aıasynda Qylmystyq kodekstegi eki normany, sonyń arasynda til tıgizýge qatysty bapty alyp tastaý qarastyrylǵan. Jalpy, Qazaqstan Respýblıkasynyń kez kelgen azamatynyń ar-namysy qorǵalady jáne azamattardyń bul quqyqtaryn buzýǵa bolmaıdy

, - dedi A. Muqanova Senatta tilshiler suraǵyna jaýap bere otyryp.

Bul turǵyda ol qazirgi kezde Parlamentte Qylmystyq kodekste arnaıy belgilengen atalǵan baptardy alyp tastaý talqylanyp jatqanyn aıtty. Bul qadamdar Konstıtýtsııada qabyldanǵan túzetý aıasynda eskerilgen. Zańnamada Elbasy jáne onyń ókilettikteri týraly kórsetilmegen, sondaı-aq bul baptar Qylmystyq kodekste qajet emes.

Sondyqtan bul jerde depýtattar usynyp otyrǵan túzetýler qabyldanǵan zańdarǵa sáıkestendirýge baǵyttalǵan. Atap aıtqanda, «Prezıdent týraly» zańda «eks-prezıdent» degen bapta tıisti norma bar. Osy bap aıasynda barlyq eks-prezıdenttiń mártebesine qatysty quqyqtar memleket basqarǵan adamdarǵa taralady

, - dedi vıtse-mınıstr.

Budan buryn habarlanǵandaı, Qylmystyq kodeksten Nursultan Nazarbaevqa til tıgizgeni úshin jazaǵa tartatyn 373 jáne 374-baptar alynyp tastalady.

Atalǵan baptardy alyp tastaýǵa qatysty Májilis depýtaty Snejana Imasheva da pikir bildirgen bolatyn.

Bıyl qańtar aıynda Parlament palatalarynyń birlesken otyrysynda «QR Tuńǵysh Prezıdenti – Elbasy týraly» Konstıtýtsııalyq zańnyń kúshi joıyldy.