«Til sheberi»: Úsh tildi meńgergen úzdikter anyqtaldy
Til saıasaty komıtetiniń tóraǵasy Ádilbek Qaba úmitkerlerdi quttyqtap, memlekettik tildiń mártebesine aıryqsha toqtaldy.
«Shet eldermen halyqaralyq baılanys artqan saıyn, kóp til biletin jas urpaq tárbıeleý qajettiligi de kún tártibine shyǵa beredi. Bul baıqaýdyń basty maqsaty - jahandyq órkenıet pen elimizdiń damý baǵytyna saı úsh tildi – qazaq, orys jáne aǵylshyn tilderin jetik meńgergen, jan-jaqty bilimdi jastardy anyqtap, qoldaý kórsetý. Biraq, bir nárseni basa aıtqym keledi, ana tiliń árqashan bıikte turýy kerek. Óıtkeni, ult ustazy Ahmet Baıtursynov aıtqandaı, «tili joǵalǵan ulttyń ózi de joǵalady». Ǵalymdardyń esepteýinshe, árbir on tórt kún saıyn bir til joǵalyp otyrady eken. Syrttan eshkim kelip, tyıym salyp jatqan joq. Qoldanys aıasy kemigendikten órisi tarylady. Sol sekildi kúndelikti turmysta qazaq tilin ekinshi kezekke ysyra bersek, qoldanystan eriksiz shyǵatyn sóz qatary kóbeıe beredi. Sondyqtan, ana tilimizdiń abyroıyn asqaq alyp júrińizder», - dedi ol.
Jastar dodasyna elimizdiń túkpir-túkpirinen 16 úmitker qatysty.
Baıqaýdyń ár kezeńine kásibı saraptama jasap, baǵa berý úshin qurylǵan qazylar alqasy talantty jastar qatary ósip keledi jatqanyn atap ótti. Olardyń pikirinshe, jarysqa túsýshiler aǵylshyn tilin jaqsy meńgergen, al ana tilinde esse jazý barysynda shuraıly oıyn shyraıly etip anyq beıneleı bildi.
Shara moderatory Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyq dırektorynyń orynbasary Aıdos Ábdihalyq jastarmen ekspress-suqbat uıymdastyryp, olardyń elimizdegi tildik ahýal boıynsha ózara pikir almasýǵa múmkindik jasady. Ara-arasynda ónerge kezek berip otyrdy. Munyń bári saıystyń tartymdy, ózara tyǵyz baılanysty ótýine áser etkeni sózsiz.
Qazylar alqasynyń sheshimi boıynsha Bas júlde men 300 myń teńgeni qostanaılyq Súleımen Keýlhosov qanjyǵasyna baılady. Birinshi orynǵa Almaty qalasynan Abzalbek Ádilhan ıe bolyp, 250 myń teńge syılyq aldy.
Ekinshi oryn men 150 myń teńge syılyq Almaty oblysynyń jas turǵyny Qanat Jaqsybaevqa buıyrdy. Úshinshi oryndy Shymkent qalasynan Aqerke Bekbolatova men Qaraǵandy oblysynan Ámirhan Oralbekov bólisip, árqaısysy 100 myń teńgeden syılyqqa ıe boldy.
Júldeli oryndy ıemdengenderge Qazaqstan Respýblıkasy Mádenıet jáne sport mınıstrligi Til saıasaty komıtetiniń dıplomy tabystaldy.
Budan basqa, belsene qatysqany úshin Aqtóbe oblysynan Qartjan Narqozy Esenkeldiuly, Pavlodar oblysynan Mýsına Maqpal Erkinqyzy, Jambyl oblysynan Sársenbaev Aldııar Baýyrjanuly 50 myń teńge syılyq jáne Alǵys hatpen marapattaldy.
Qalǵan qatysýshylar Alǵys hatqa ıe boldy.
