Til saıasatyndaǵy basym baǵyttyń biri memlekettik tilde is júrgizýdiń órisin keńeıtý - Ahmetjan Esimov
MATY. 22 qyrkúıek. QazAqparat /Erlik Erjanuly/ - Sońǵy jarty jyldyqtyń qorytyndysy boıynsha, Almaty qalasynyń jergilikti atqarýshy organdarynda memlekettik tilde is júrgizýdiń úles salmaǵy 82 paıyzdan asty. Ony qala ákimi Ahmetjan Esimov búgin "Ana tilim - ardaǵym" dep atalatyn festıvalde aıtty.
"Qazir qalada qazaq tilindegi nusqasy joq is qaǵazdary qabyldanbaıdy. Aýdan ákimderi men basqarma basshylaryna budan bylaı da qujattardyń zań aıasynda rásimdelýin qadaǵalaýdy tapsyramyn. Almaty qalasynda tildi oqyp-úırenýge, meńgerýge, memlekettik tilde is júrgizýge, sonymen qatar ulttyq mádenı ortalyqtardyń óz ana tilderin úırenýine tolyq jaǵdaı jasalǵan. Oǵan jergilikti bıýdjetten jetkilikti qarajat bólinip otyr", - dedi A.Smaǵululy. Qazir Almaty qalasy ákimdiginiń janyndaǵy Til oqý-ádistemelik ortalyǵynda memlekettik tilmen qatar - kúrd, koreı, túrik, vengr, polıak, aýǵan, osetın jáne taǵy basqa 19 ult tilderin oqytý qolǵa alyndy. Qala basshysynyń aıtýynsha, Almatydaǵy 53 joǵary oqý ornynda 186 myńnan astam stýdenttiń jartysynan astamy ana tilimizde oqyp jatyr. "Eger salystyratyn bolsaq: 1990-91 oqý jyldary joǵary oqý oryndarynda qazaq tilinde oqytatyn toptardyń sany 13 paıyz bolatyn. Qazir ol 51 paıyzdan asyp otyr. Bul qubylys óziniń zańdyq jalǵasyn tabady dep oılaımyn", - deıdi Ahmetjan Esimov.
