«Til» oqytý-ádistemelik ortalyǵy ózge ult ókilderine óz ana tilderin úırenýine jaǵdaı jasap otyr
ALMATY. Shildeniń 15-i. QazAqparat /Ádilet Musahaev/ - Almaty qalasy ákimdiginiń Tilderdi damytý basqarmasynyń janynan qurylǵan «Til» oqytý-ádistemelik ortalyǵy ózge ult ókilderine óz ana tilderin oqyp úırený úshin turaqty kýrstar uıymdastyryp otyr.
Bul jaıynda búgin Almaty qalasy ákimdiginiń «Til» oqý-ádistemelik ortalyǵynyń ádiskeri Tamara Jumaǵulova Qazaqstan-koreı jastarynyń qazaq tilin oqý forýmy barysynda aıtty.
Ortalyqtyń materıaldyq-tehnıkalyq bazasynda qala boıynsha zamanaýı qural-jabdyqtarmen jabdyqtalǵan 10 mýltımedıalyq bólmeleri bar.
«Medıakabınetterdiń barlyǵynda is júrgizýge qajetti qujattardyń memlekettik tildegi úlgileri, eki tildi elektrondy sózdik, qazaq tili orfografııasy men orys tilinen qazaq tiline aýdarma jasaý baǵdarlamasy jáne oqytý úrdisinde jıi qoldanylady degen 11 elektrondy baǵdarlama engizilgen», deıdi T.Jumaǵulova.
Ortalyq baspadan kóptegen oqý quraldaryn, ózdiginen bilim alýǵa arnalǵan ár sala boıynsha jasalǵan tilasharlardy jasap shyǵarǵan. Sonymen qatar qala kólemi boıynsha jergilikti atqarý organdarynyń qyzmetkerlerine, bıýdjettik mekeme qyzmetkerlerine jáne qala turǵyndaryna memlekettik til men aǵylshyn tilin úırený kýrstary uıymdastyrylǵan. «Memlekettik tildi oqytý kýrsy boıynsha 2009 jyly 118 topta, 1042 tyńdaýshy oqyp bilim aldy. Búgingi kúni 66 topta, 488 tyńdaýshy bilim alýda», deıdi Tamara Málikqyzy.
Sondaı-aq ol «Til» oqý-ádistemelik ortalyǵynda tildi úıretýge bilikti mamandar tartylǵandyǵyn aıtady. «Oqytýshylar ár jyl saıyn biliktilik kóterý kýrsynan ótip turady. Ásirese, memlekettik qyzmetkerlerge, eresek adamdarǵa til úıretkende oqytýshynyń óte saýatty, bilikti, bilimdi maman bolǵany durys», deıdi til mamany.
