Til máselesine arnalǵan memlekettik baǵdarlamada utymdy sheshimder men usynystar qamtylǵan - A.Aıtaly
ASTANA. Shildeniń 26-sy. QazAqparat /Rýslan Ǵabbasov/ - Til máselesine arnalǵan memlekettik baǵdarlamada utymdy sheshimder men usynystar qamtylǵan.
Bul týraly búgin Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasyn talqylaýǵa arnalǵan otyrysta belgili qoǵam qaıratkeri Amangeldi Aıtaly aıtty.
«Búginde elimizdiń 63 paıyzyn quraıtyn, endi 10 jyldan keıin 70 paıyzdan asatyn qazaqtarǵa jáne basqa eldegi azamattarǵa qyzmet qaı tilde jasalady? Búgingi talqylaý sol máseleniń aldyn alý úshin jáne qaýip-qaterdiń aldyn alý bolyp otyr. Eger de búgingi jaǵdaı jalǵasa berse, sóz joq, bul basym 70 paıyzdan astam qazaq halqynyń 10 jyldan keıin ashý-yzasyn týdyrady. Búginde de shıelenister bar», - dedi A.Aıtaly.
«Al eldi belden basyp, búgin men erteńge memlekettik tildi revolıýtsııalyq jolmen engizemiz desek, bul da qaýipti. Baǵdarlama osy eki qaýip qaterdiń ortasynan jol izdegen dep oıdamyn jáne baǵdarlamanyń utymdy sheshimder men usynystary bar», - dedi ol.
Professordyń sózine qaraǵanda, ult qanshalyqty ana tilinde sóılesse, onyń bolashaǵy da sonshalyqty. «Sondyqtan bul qujatta basty maqsat - bul mektepke deıingi, mektep jasyndaǵy, joǵary oqý oryndaryndaǵy, sondaı-aq keıingi bilim satylaryna arnalǵan jáne bul baǵyttardy óte oryndy dep sanaımyn», - dedi A.Aıtaly.
«Endi eresek adamdarǵa memlekettik tildi úıretý ol óte qıyn. Sondyqtan meniń oıymsha, baǵdarlamada memlekettik tildi úıretýdiń pedagogıkalyq, aqparattyq, mádenı negizderi oılastyrylyp, tereń zerdelengen dep oılaımyn. Osy tusqa kelgende men osyny qoldaımyn», - dedi ol.
A.Aıtalynyń pikirinshe, bul baǵdarlamanyń quqyqtyq-áleýmettik tustaryn áli de pysyqtaý qajet. Onyń aıtýynsha, baǵdarlamynyń birinshi betindegi negizdemege QR Konstıtýtsııasynyń 33 babynyń 4 tarmaǵyn engizý kerek.
