Til máselesin sheshýdiń basty tetigi áli kúnge iske qosylmaı keledi - Q. Aıtahanov
Saýal barysynda senator Elbasy N. Nazarbaev 2025 jylǵa qaraı qazaqstandyqtardyń 95 paıyzy qazaq tilin bilýge tıistigi týraly mindet qoıǵanyn eske saldy. Sonymen qatar, depýtat memlekettik tilge oqyp-úırený balabaqsha men mektepten bastaý alatynyn, bul baǵytta birqatar jumystar atqarylyp jatqanyn jetkizdi. Máselen, qazirgi tańda mektep oqýshylarynyń 63 paıyzdan astamy qazaq tilinde oqysa, 30-dan astam basqa ult ókilderi qazaq synyptarynda oqyp júr. Bıylǵy oqý jyylnan bastap barlyq mektepterge qazaq tilinde júrgiziletin ólketaný, alashtaný, abaıtaný kýrstary da engizilgen.
«Alaıda til máselesin sheshýdiń basty tetigi iske qosylmaı keledi. Bul - memlekettik tilge degen qajettilik. Búginde Úkimetten bastap, bılik tizginin ustap otyrǵan basshylar, memlekettik qyzmetshiler mindetti túrde memlekettik tilin bilýi tıis degen qaǵıdany basshylyqqa almaıtyn sekildi. Qazaq tili memlekettiń mártebesin alǵanymen, memlekettik organdardyń esiginen syǵalap kire almaı, kirse de tórge shyǵa almaı júr. Memlekettik til memlekettik dárejede talap etilmegendikten, kóp azamattar Qazaqstandaǵy qazaq tiliniń bolashaǵyna senińkiremeıdi. Sondyqtan da ony úırenýge yntalanbaıdy. Búginde qazaq balalarynyń 37 paıyzy orys mektepterinde oqýy - sonyń aıǵaǵy», - deıdi depýtat.
Osyny aıta kele, senator elimizde qazaq mektepter sanynyń jetispeýshiligin alǵa tartty. Onyń aıtýynsha, elimizdiń keıbir óńirlerinde qazaq mektepteriniń jetispeýshiliginen 161 bala ózbek tilinde, 101 bala uıǵyr tilinde oqýǵa májbúr. «Óz elinde turyp, óz ana tilinde oqýǵa múmkindik bolmaýyn qalaı túsinýge bolady?» - dedi Q. Aıtahanov.
