Til máselesi ult rýhanııatynyń altyn qazyǵy -Mádenıet jáne aqparat mınıstri
ALMATY. Qańtardyń 21-i. QazAqparat /Erlik Erjanuly/ - Bul baǵdarlamanyń burynǵydan ereksheligi, onyń memlekettik mártebesi joǵary bolmaq. Bul týraly búgin Mádenıet jáne aqparat mınıstri Almatyda tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyn ázirleý jónindegi jumys tobynyń otyrysynda aıtty,
dep habarlaıdy QazAqparat.
"Elbasynyń tapsyrmasy boıynsha osydan týra on jyl buryn Qazaqstandaǵy tilderdi damytýdyń 10 jyl merzimge arnalǵan baǵdarlamasy jasalǵan bolatyn. Osy baǵdarlamanyń aıasynda kóptegen jumystar atqaryldy. Bıyl ol óziniń máresine jetedi. Endi aldaǵy 10 jylǵa arnalǵan jańa baǵdarlama jasaýǵa kirisýimiz kerek. Bul baǵdarlamanyń burynǵydan ereksheligi, onyń memlekettik mártebesi joǵary bolady. Ol Nursultan Nazarbaevtyń Jarlyǵymen bekitiledi. Ózderińiz baspasózden biletin bolarsyzdar, keıingi kezde Prezıdenttiń oryndalatyn-oryndalmaıtyn baǵdarlamalar sanyn kóbeıtpeý jóninde tapsyrmasy bar. Sondyqtan mundaı baǵdarlamalar jasaýǵa shekteý qoıylǵan. Biraq til máselesi, ult rýhanııatynyń altyn qazyǵy bolǵandyqtan, bul máselege Nursultan Ábishuly erekshe mańyz berip baǵdarlamany jasaýǵa tapsyrma berdi", dedi Mádenıet jáne aqparat mınıstri Muhtar Qul-Muhammed.
Onyń aıtýynsha, Elbasynyń tapsyrmasy búkil eldiń tarıhyna, rýhanııatyna, mádenıetine qatysty bolǵandyqtan bul máseleni keń otyryp kelisip, búkil qoǵamdyq uıymdarmen, til máselesine janashyrlyq tanytqan barsha azamattarmen birlesip daıyndaýdy tapsyrǵan. Sondyqtan buǵan tek Úkimet músheleri ǵana emes, Parlamenttiń qos palatasynyń til saıasatynda kópten qyzmet atqaryp júrgen depýtattary men respýblıkadaǵy barlyq qoǵamdyq uıymdardyń músheleri qatysyp otyr. Tipti jeke-dara shyǵyp, qaıratkerlik tanytyp júrgen, eshbir partııa men uıymǵa kirmegen azamattar da yntaly topqa múshe retinde engen.
Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasyn ázirleý jónindegi jumys tobyna Mádenıet jáne aqparat mınıstri tóraǵalyq etpek. Oǵan - respýblıkalyq "Memlekettik til" qoǵamdyq qozǵalysynyń tóraǵasy Muhtar Shahanov pen Mádenıet jáne aqparat mınıstriniń jaýapty hatshysy Janna Qurmanǵalıeva orynbasar bolyp otyr.
