Til komıtetiniń tóraǵasy Tilderdi qoldaý men damytýdyń 2011-2020 jyldarǵa arnalǵan baǵdarlamasy arqyly til úıretý ortalyqtarynyń jumysy sapalana túsetinine senim bildirdi
ASTANA. Qyrkúıektiń 3-i. QazAqparat /Gúlmıra Álıakparova/ - Tilderdi qoldaý men damytýdyń 2011-2020 jyldarǵa arnalǵan memlekettik baǵdarlamasynyń aıasynda qurylatyn qazaq tilin oqytý ortalyqtarynyń jelisi, búgingi kúni erinbegenderdiń ermegine aınalǵan qaptaǵan ortalyqtardy joıýǵa yqpal etpek. Bul týraly búgin Astana qalasy ákimdiginde atalmysh baǵdarlamanyń jobasyn talqylaýǵa arnalǵan keńeste QR Mádenıet mınıstrligi Til komıtetiniń tóraǵasy Baýyrjan Omarov aıtty.
«Baǵdarlamada kórsetilgen mindetterge sáıkes, arnaıy akkredıtatsııadan ótken qazaq tilin oqytý ortalyqtarynyń jelisi qurylady. Al ázirge erinbegen eki adam ortalyq ashyp, biri basshy, bir qosshy bolyp til syndyrýmen aınalysyp júrgeni belgili. Tómengi baǵa belgilep, tenderden utyp alǵan aqshasy aılyǵyna da, shaıyna da jetpeıtin, oqýlyǵy túgili, oqytýshysy da joq ortalyqtar sabaq berip jarytpaıdy. Til úırenýge qulqy joq keıbir mekemeler qaǵaz júzinde ǵana oqytatyn, izdegenge - suraǵan, osyndaı ora sholaq ortalyqtarmen kelisimshart jasasýǵa májbúr», - dedi ol.
Onyń aıtýynsha, eger bul máseleler oń sheshilse atalǵan kóldeneń kók attylar Astana qalasynyń «Rýhanııat» pen «Zerde» til úıretý ortalyqtarynyń aldyn orap kete almaıdy.
«Bul baǵytty iske asyrý arqyly ortalyqtardyń bilim berý qyzmetiniń mindetti standarttaryn qabyldaý ǵana emes, olardyń qyzmetin baǵalaýdyń reıtıngilik júıesin de engizý kózdeledi. Tyńdaýshylardyń «Qaztesti» tapsyrýlary nátıjeleri arqyly shynaıy málimetter reıtıngtiń negizi bola alady. Sondaı-aq synaq, biliktilik ortalyqtary jelisin qurý da kózdelgen. Mundaı ortalyqtar jelisi memlekettik tildi bilý deńgeıin rastaıtyn «Qaztest» sertıfıkattaryn berýge de, oqytýshylardy attestattaý júıesin qurýǵa da arnalǵan», - dedi Komıtet tóraǵasy.
