Til komıteti men «Parasat» ortalyǵynyń qyzmetkerleri 10 mln.-ǵa jýyq qarjyny urlaǵandary úshin shartty túrde sottaldy
ASTANA. 4 sáýir. QazAqparat - Astana qalalyq ekonomıkalyq qylmysqa jáne sybaılas jemqorlyqqa qarsy kúres departamenti (Qarjy polıtsııasy) Mádenıet mınıstrligi
Til komıtetiniń qyzmetkeri Q.Jaqypovaǵa jáne «Parasat» aqparattyq-taldaý ortalyǵy» qoǵamdyq birlestiginiń esepshisi M.Kamshılınaǵa qatysty qylmystyq istiń tergeýin aıaqtady.
Qarjy polıtsııasy baspasóz qyzmetiniń habaralýynsha, olar ózderiniń qyzmet babyn paıdalanyp, Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń túrli sharalardy (konferentsııalar, jarystar, t.b.) ótkizý úshin bólinetin qarajattaryn is júzinde oryndalmaıtyn kelisimsharttar jasaý jolymen urlaý maqsatynda qylmystyq jospar quryp, memleketke 9,5 mln. teńge somasyna zalal keltirdi.
Astana qalasynyń Saryarqa aýdandyq №2 sotynyń úkimimen Q.Jaqypova QR QK 28-baby 2-bóligi (oryndaýshy), 176-baby 3-bóligi «b», «g» tarmaqtary (senip tapsyrylǵan bóten múlikti ıelenip alý nemese ysyrap etý) boıynsha kináli dep tanylyp, 3 jyl synaq merzimimen shartty túrde 5 jylǵa bas bostandyǵynan aıyrýǵa sottaldy.
Al M. Kamshılına QR QK 28-baby 2-bóligi (oryndaýshy) 176-baby 3-bóligi «b» tarmaǵy (senip tapsyrylǵan bóten múlikti ıelenip alý nemese ysyrap etý) boıynsha kináli dep tanylyp, 3 jyl synaq merzimimen shartty túrde 5 jylǵa bas bostandyǵynan aıyrý jazasyna kesildi.
