«Til-Qazyna» ortalyǵy birneshe tildi qashyqtan úırete bastady

NUR-SULTAN. QazAqparat – Respýblıkadaǵy til oqytý ortalyqtary elimizdegi karantın kezinde memlekettik til jáne basqa da tilderdi qashyqtan oqytý sharasyn bastady, dep habarlaıdy QazAqparat tilshisi.

Qashyqtan oqytý sharasy Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń qoldaýymen uıymdastyrylǵaly otyr. Onyń maqsaty – karantın kezinde eresek azamattarǵa memlekettik jáne ózge tilderdi onlaın rejimde ınnovatsııalyq ádister arqyly tegin oqytý, elektrondy oqý quraldarymen qamtamasyz ete otyryp, til úırenýge arnalǵan ІT baǵdarlamalar men platformalar arqyly ózdiginen oqýǵa shaqyrý.

«Qashyqtyqtan bilim berý – oqytýdyń aıryqsha tehnologııasy degen sóz emes, bul, eń birinshi kezekte, «aýdıtorııada ǵana oqý» sekildi qalyptasqan qasań túsiniktiń tar aýqymynan shyǵýǵa múmkindik beredi. Sondyqtan respýblıkamyzdyń túkpir-túkpirindegi ortalyqqa qarasty tilderdi damytý, oqytý ortalyqtarynyń qazirgi qashyqtyqtan oqytý rejimi týraly izdenisin pandemııa jaǵdaıyndaǵy eriksiz májbúrlilik dep emes, qaıta osy shekke deıin bul salada jınaqtalǵan mol tájirıbeni keńinen qoldanýdyń jan-jaqty múmkindigi retinde qabyldaýǵa bolady», - dep habarlaıdy «Til-Qazyna» ortalyǵynan.

Osy sala boıynsha qyzmet jasaıtyn 98 oqytý ortalyǵy búgingi tańda qashyqtan oqytý úrdisin «Qashyqtan oqyp, til úıren!» aktsııasy aıasynda jalǵastyryp otyr.

Árbir jergilikti jerdiń baılanys múmkindigi eskerilip, ynta bildirýshiniń yńǵaıyna qaraı tańdaý erki qarastyrylǵan. ZOOM, Whatsapp, Skype, Google Classroom, Telegram, Instagram platformalary arqyly tikeleı onlaın sabaqqa qatysyp, onlaın sabaq jazbasyn alý múmkindigi de qarastyrylǵan. Tildi óz erkimen úırengisi keletin azamattarǵa arnalǵan Tilqural.kz saıty jumys jasaıdy. Elektrondy oqý quraldaryn, qajetti aqparatty elektrondy poshtamen alýǵa bolady.

Oqytý ortalyqtarynyń tájirıbeli, bilikti oqytýshylary ınnovatsııalyq tehnologııalardy, ádisterdi paıdalana otyryp, qyzyqty ári paıdaly dáris júrgizedi.