Til ıgerý úshin tilek te kerek, júrek te kerek - Til komıtetiniń tóraǵasy
ASTANA. Qyrkúıektiń 3-i. QazAqparat /Gúlmıra Álıakparova/ - Til ıgerý úshin tilek te kerek, júrek te kerek. Bul týraly búgin Astana qalasy ákimdiginde Tilderdi qoldaý men damytýdyń 2011-2020 jyldarǵa arnalǵan memlekettik baǵdarlama jobasyn qoǵamdyq talqylaý barysynda QR Mádenıet mınıstrligi Til komıtetiniń tóraǵasy Baýyrjan Omarov bildirdi.
«Táýelsizdik týy tigilgen Qazaqstanda kezinde tyń ıgerilgen dalada til ıgerile bastady. Aqyry arqa tósinde ásem qala Astana shańyraq kóterdi. Jas shahardyń besigi qazaqylyǵynyń aıasynda terbeldi. Tiliniń tútini túzý ushty. Bir kezde S.Seıfýllın bir maqalasynda «Qazaq tili Aqmolada ázirshe jumylǵan aýyzdyń ishinde tur» dep jazyp edi. Sol aýyz áldeqashan ashylǵan. Tildiń býylǵan, túıilgen tustary sheshilgen. Biraq tóbesinde úkisi bar tilimizdiń ketpegen múkisi de joq emes. Búginde Astana qalasynyń Til basqarmasy memlekettik tildiń basyna taqqan úkisin mápeleı otyryp, baıaǵyda qalyp qoıǵan múkisin ketirý úshin aıanbaı kúresip jatyr», dep atap ótti ol.
B.Omarov, kezinde Almatynyń baı dástúrin, tildik ortasynyń qaımaǵyn buzbaı saqtap, tilimizdiń tulparyn jaqsylap turyp baptap bergen, búginde Astananyń tizginin qolǵa alyp, til máselesin retteı bastaǵan qala basshylyǵana rızalyǵyn bildirdi.
«Jıǵan baılyǵyń men ıman baılyǵyń tarazyǵa túsip turǵan zamanda, tildiń ımanǵa serik bolǵany durys. Óıtkeni Abaı atamyz aıtqandaı,
«til - júrektiń aıtqanyna kónse ǵana jalǵan shyqpaıdy». Demek, til ıgerý úshin tilek te kerek, júrek te kerek.
Komıtet tóraǵasynyń aıtýynsha, búginde Astana qalasynyń ákimdigi janyndaǵy 10 basqarmada is qaǵazy qazaq tiline tolyǵymen kóshirildi.
«Ózge óńirler tek qana memlekettik qyzmetkerlerdi tegin oqytyp, qalǵandarǵa ne aqshasyn qımaı, ne basqasyn qımaı oılanqyrap otyrǵanda, Astana qalasynyń ákimdigi densaýlyq saqtaý, sport, bilim berý jáne ulttyq mádenı ortalyqtardyń qyzmetkerlerin aqy-pulsyz til úıretýge sheshim qabyldady», - dedi.
