Til bilmegen qytaılyq týrıst Germanııada bosqynǵa aınalǵan
ASTANA. QazAqparat - Germanııanyń Dortmýnd qalasyndaǵy mıgranttar ortalyǵynda qytaılyq týrıst eki apta ómir súrgen. Ol polıtsııaǵa ámııanynyń urlanǵanyn habarlaǵasy kelgen, alaıda til bilmegen týrıst mıgratsııalyq qyzmetke adasyp baryp, «bosqyn» dep tirkelip ketken, dep habarlady VVS agenttigi.
Ne aǵylshyn, ne nemis tilin bilmeıtin 31 jastaǵy Qytaı azamaty qajetti saýalnamany toltyryp, medıtsınalyq tekserýden ótip, saýsaq tańbasyn ótkizgen. Sodan keıin onyń shengen vızasy bar pasportyn alyp, mıgranttardyń ýaqytsha baspanasyna ornalastyrǵan.
Bolǵan jaǵdaıǵa er adam esh qarsylyq kórsetpegen. Ortalyq oǵan kún saıyn tamaq jáne jumsaıtyn aqsha berip turǵan.
Máseleniń mán-jaıyn anyqtaýǵa sebepshi bolǵan jergilikti Qyzyl krest bóliminiń qyzmetkeri sheteldiktiń bosqynǵa uqsamaıtynyn aıtqan. Ortalyq qytaı tiliniń aýdarmashysyn shaqyryp, «bosqynnyń» kim ekenin suraǵan. Suhbattan keıin onyń Eýropany óz betimen aralap júrgen týrıst ekeni, Germanııadan keıin Frantsııa men Italııaǵa barýdy josparlaǵany belgili boldy. Til bilmeýdiń kesirinen osyndaı kúıge túskenin aıtqan.
«Bosqynnyń» baspana alýǵa bergen ótinishi kúshin joıyp, ári qaraı saparyn jalǵastyrýǵa ruqsat etildi. WDR nemis telearnasy «týrıstiń» eshqandaı renish bildirmegenin, tek Eýropany basqasha elestetkenin aıtty dep habarlady.
