Tyl ardagerine qurmet kórsetildi
ORAL. KAZINFORM – Búgin aımaq basshysy Narıman Tóreǵalıevtiń tapsyrmasymen Oral qalasynyń ákimi Murat Baımenov tyl eńbekkeri, sanaly ǵumyryn ustazdyq qyzmetke arnaǵan ardager Sándesh Jaqashevanyń shańyraǵyna arnaıy baryp, qal-jaǵdaıyn bildi.
Kezdesýde ardager ustazdyń ónegeli ómir joly, urpaq tárbıesine qosqan eleýli úlesi týraly áńgime órbidi. Qala ákimi soǵys jáne tyl ardagerlerin áleýmettik qoldaý Prezıdenttiń, óńir basshylyǵynyń tikeleı nazarynda ekenin aıta kele, keıýanaǵa qurmet kórsetip, izgi tilegin jetkizdi.
Óz kezeginde Sándesh Jaqasheva kórsetilgen iltıpatqa rızashylyǵyn bildirip, aq batasyn berdi.
– Elge adal qyzmet etý – eń úlken paryz. Halyqtyń alǵysyn alý – zor baqyt. Shúkir, aspanymyz ashyq. Jas tolqyndy tárbıeli, bilimdi, eńbekqor bolýǵa shaqyramyn. Arnaıy kelip, jaǵdaıymdy surap jatqandaryńyzǵa kóp raqmet, – dedi ardager ustaz.
Aıta keteıik, BQO-da soǵys jáne tyl ardagerlerine qurmet kórsetý, olardyń áleýmettik jaǵdaıyna kóńil bólý jáne aǵa býyn ókilderine qoldaý bildirý baǵytyndaǵy jumystar turaqty túrde jalǵasyp jatyr. Tyl eńbekkeri Sándesh Jaqashevaǵa da birjolǵy áleýmettik tólem tabystaldy.
