Tikushaq apatynan qaza tapqandardyń otbasyna qandaı kómek kórsetiledi

TALDYQORǴAN. QazAqparat - Qyzylorda oblysyndaǵy qaıǵyly oqıǵadan qaza tapqan áskerılerdiń otbasyna materıaldyq kómek kórsetiledi, dep habarlaıdy QazAqparat tilshisi.

«Qaza bolǵan áskerı qyzmetshilerdiń otbasyna Qorǵanys mınıstrligi tarapynan materıaldyq-moraldyq kómek kórsetiledi. 5 jyldyq jalaqysyn tólep, qyzmettik úılerin tegin jekeshelendirip beredi nemese jekemenshikke turǵyn úı satyp alý úshin aqshalaı ótemaqy beriledi. Jáne barlyq jerleýge ketken shyǵyndar óteledi»,- dedi Almaty oblystyq óńirlik kommýnıkatsııalar qyzmetinde ótken arnaıy brıfıng barysynda Taldyqorǵandaǵy 21/751 áskerı bólim komandıriniń orynbasary Bekbolat Jumabaev.

Tikushaq apatynan ómiri qıylǵan 13 azamattyń 8-i Aqtaýdaǵy 30/153 áskerı bóliminde otan aldyndaǵy azamattyq boryshyn ótep júrgen Almaty oblysynyń týmalary. Olar maıor Tımýr Qudaıberdıev, 3-sanatty serjant Qaırat Nýsapanov, aǵa serjant Murat Sharıpov,kishi serjant Ashat Abdýlmanat, efreıtor Mıras Jumataev pen Qýanysh Sarqytbaev, Aıdyn Abıldınov jáne leıtenat Aslan Aıtbaev. Al olardyń beseýi úsh aı buryn ǵana Taldyqorǵandaǵy 21/751 áskerı bóliminde qyzmet etken.

Eske sala ketsek, QR ІІM TJK baspasóz qyzmeti buǵan deıin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.

Qorǵanys mınıstrliginiń aqparatyna sáıkes, atalǵan tikushaq 4 birdeı áskerı tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaıy bólimshelerdiń «Altyn jebe» keshendi oqý jáne jattyǵý aıasynda qarańǵyda ári kúrdeli meteorologııalyq jaǵdaıda júrgizilgen.

Tikushaqta bolǵan 13 adam qaza tapty.