Tikushaq apaty: Jalǵyzynan aıyrylǵan ata-anaǵa baspana berilgenimen, qujattary áli joq
TALDYQORǴAN. QazAqparat - Almaty oblysynda 2016 jyldyń 27 qańtarynda tikushaq apatynan qaza tapqan Gúlnur Hamıtovanyń ata-anasyna baspana berilgen. Alaıda marqum bolǵan qyzdyń ata-anasy 3,5 jyldan beri úıdiń qujattaryn ala-almaı otyrǵandaryn aıtady, dep habarlaıdy QazAqparat tilshisi.
«Osy ýaqytqa deıin Taldyqorǵan qalalyq TÚKSh bólimi, qalalyq ákimdik, oblystyq densaýlyq saqtaý basqarmasyna birneshe ret bardym. Barlyǵy aty-jónimdi jazyp qalady, «mine qatyramyz», deıdi. Mine osyndaı qurǵaq ýáde estigemine 3,5 jyl boldy. Qyzymnyń qazasynan keıin úıdi berdi, biraq qujat joq. Shynymdy aıtsam, erteń dalada qalamyz ba dep qorqamyz», - dedi kózine jas alǵan Gúlnur Hamıtovanyń anasy Indıra Bekdýllına.
22 jasynda qyzmet barysynda qaza tapqan Gúlnur Hamıtova otbasynyń jalǵyz balasy bolǵan.
Esterińizge sala keteıik, Gúlnur Hamıtova sanavıatsııanyń feldsheri qyzmetin atqarǵan. Ol 2016 jyldyń 27 qańtarynda tikushaq apatynan qyzmet barysynda qaza tapty. Sol sátte sanavıatsııa Úsharaldan Taldyqorǵanǵa aq qan aýrýyna shaldyqqan kishkentaı sábıdi jetkizbek bolyp, Taldyqorǵanǵa 30 shaqyrym qalǵan sátte apatqa ushyraǵan bolatyn. Tikushaqta bolǵan 5 adam da mert boldy. Olardyń denesi 15 saǵattyq izdeýden soń ǵana taýly aımaqtan tabylǵan bolatyn.
Al Taldyqorǵan qalalyq TÚKSh bólimi 3,5 jyldan beri Gúlnur Hamıtovanyń ata-anasyna berilgen úıdiń qujattaryn bir aptada jasap beremiz dep ýáde berdi.
«Taldyqorǵan qalasynyń turǵyny Gúlnur Hamıtovaǵa kezinde 2016 jyly 9 yqsham aýdannan bir bólmeli páter berilgen bolatyn. Ol kisiniń qujattaryn bizge kelip ótkizsin. Biz ony arnaıy komıssııaǵa kirgizip, qujatyn bir aptanyń ishinde rettep beremiz», - dedi Taldyqorǵan qalalyq TÚKSh bóliminiń sektor meńgerýshisi Danııar Orazov.
Esterińizge sala keteıik, dál osy tikushaq apatynda qaza tapqan gemotolog-dáriger Baqytgúl Qaısanovanyń qyzyna berilgen úıdiń birde-bir qujattary joq ekenin buǵan deıin jazǵan bolatynbyz.
