Tikushaq apaty: Taldyqorǵanda qaraly mıtıng ótip, eki sarbaz jerlendi
TALDYQORǴAN.QazAqparat - Taldyqorǵannyń ortalyq alańynda qaraly mıtıng ótip, tikushaq apatynan qaza tapqan efreıtor Aıdyn Ábdildınov pen efreıtor Mıras Jumataevty sońǵy saparǵa shyǵaryp saldy.
Almaty oblysynan qaza tapqan 8 áskerı qyzmetshiniń tórteýiniń denesi áli anyqtalmaı jatyr, dep habarlaıdy QazAqparat tilshisi.
Qoshtasý rásimine Qorǵanys Mınıstri general-maıor Nurlan Ermekbaev, Qazaqstan Musylmandary Dinı Basqarmasynyń bas múftıi Serikbaı qajy Oraz, Almaty oblysynyń ákimi Amandyq Batalov jáne áskerı óyzmetkerler men olardyń týǵan-týystary qatysty. Taldyqorǵannyń ortalyq alańyna jınalǵan marqumdardyń týǵan-týys, dos-jarandaryna QR Qorǵanys mınıstri Nurlan Ermekbaev kóńil aıtyp, bekem bolýǵa shaqyrdy.
«Olar aqtyq demi qalǵansha Otanǵa adal bolýdyń úlgisin kórsetti. Batyrlarymyzdy máńgi umytpaý maqsatynda memorıal ornatý josparda bar. Olar memlekettik nagradaǵa usynylatyn bolady. Odan bólek, sarbazdardyń otbasyna mınıstrlik tarapynan jan-jaqty qoldaý kórsetiledi» dep atap ótti mınıstr.
Qaza tapqan Aıdyn Ábdildınovtyń artynda jary men eki kishkentaı qyzdary qaldy. Páter jaldap, kún keship jatqan otbasynyń jary joldasyn sońǵy ret qańtar aıynda kórgenin aıtady. 
«Joldasymdy sońǵy ret qańtar aıynda kórdim. Kúnde sóılesip turatynbyz, bolǵan jaıtqa áli de sener alar emespin. Eki qyzymyz bar. Úlkenim 12 de. Kishim 6 jasta. Kúıeýimniń jasaı almaı ketken jasyn qyzdaryma bersin. Basqa otbasylaryna qaıǵyryp kóńil aıtamyn. Elimiz tynysh bolsyn. Mundaı jaǵdaılar qaıtalanbasyn dep tileımin», - dedi marqum bolǵan efreıtor Aıdyn Ábdildınovtyń jary Samal Serikqyzy.
Marqum bolǵan 28 jastaǵy Mıras Jumataev shańyraq kóterip úlgermegen. Egilip jylaǵan Mırastyń anasy ulynyń bul ómirde endi joq ekenine sener alar emes.
«Búgin maıor Tımýr Qudaıberdıevti Eńbekshiqazaq aýdanynda jáne leıtenant Aslan Aıtpaevty Kerbulaq aýdanynda jerlep jatyr. Qalǵan 4 sarbazdyń denesi áli anyqtalmady. Efreıter Qýanysh Sarqytbaevtyń aǵasynan qan alyp, saraptamaǵa jóneltip jatyr. Qalǵan úsheýi serjant Qaırat Nursapanov, aǵa serjant Murat Sháripov jáne kishi serjant Ashat Abdýlmanattyń deneleri áli anyqtalýda», - dedi Almaty oblystyq Qorǵanys isteri jónindegi departamenttiń baspasóz hatshysy Janar Ámirjanova.
