Tikushaq apaty: Taldyqorǵan men eki aýdanda qaraly mıtıngter ótti
TALDYQORǴAN. QazAqparat - Almaty oblysynyń turǵyndary tikushaq apatynda qaza bolǵan áskerı qyzmetshilermen qoshtasty. Qaraly mıtıngter Taldyqorǵan qalasynda, Alakól jáne Kerbulaq aýdandarynda ótti, dep habarlaıdy QazAqparat tilshisi.
Jetisýlyqtar 3-shi sanattaǵy serjant, eki balanyń ákesi Qaırat Nursapanov pen aǵa serjant, 4 balanyń ákesi Murat Sharıpovty Alakól aýdanynda sońǵy saparǵa shyǵaryp saldy. Efreıtor, eki balasy men jary artynda qalǵan Qýanysh Sarqytbaevty Saryózek aýylynda jer qoınyna tapsyrdy.
Al Taldyqorǵan qalasynda áskerıler men týystary kishi serjant Ashat Abdýlmanatpen qoshtasty. Ortalyq alańda qaraly mıtıng ótip, qorǵanys mınıstrliginiń ókilderi men qala basshylyǵy qaıǵyǵa ortaqtasyp, marqumdardyń jaqyndaryna kóńil aıtty. Ashat Abdýlmanattyń artynda anasy, jary jáne 4 balasy qaldy.
Bul sarbazdardyń barlyǵy osyǵan deıin Taldyqorǵandaǵy 21/751 áskerı bóliminde qyzmet etken. Qańtar aıynan bastap olardyń jumysy Aqtaýǵa aýystyrylǵan.
