Tikushaq apaty: Sky Service áýe kompanııasynyń jumysy toqtatyldy
ASTANA. QazAqparat - Almaty qalasynda tikushaǵy apatqa ushyraǵan «SKY SERVICE» áýe kompanııasynyń ushý qyzmeti ýaqytsha toqtatyldy, dep habarlaıdy Qazaqparat QR IIDM Azamattyq avıatsııa komıtetine silteme jasap.
«ES130 T2 markaly tikushaqtyń (Tirkeý nómiri UP-EC038) apatqa ushyraýyna baılanysty QR IIDM Azamattyq avıatsııa komıteti 2019 jyldyń 18 qańtarynan bastap, «SKY SERVICE» AQ áýe kompanııasynyń ushý qyzmetin ýaqytsha toqtatady», - delingen habarlamada.
Eske sala ketsek, keshe Almaty qalasynyń Naýryzbaı aýdanyndaǵy Taý samaly shaǵyn aýdanynda tikushaq apatqa ushyrap, ushqyshtyń qaza tapqanyn habarlaǵan edik. Apatqa qatysty tergeý jumystary bastaldy.
«Sky Service» áýe kompanııasy 2005 jyly qurylǵan. Kompanııa tikushaqpen kommertsııalyq ushýlar men jergilikti jerlerdi monıtorıngileý jáne avıatsııalyq-qutqarý jumystary salasyndaǵy qyzmetterdi usynady. Áýe kompanııasynyń 12 tikushaǵy jáne 2 ushaǵy bar. Kompanııanyń áýe parkinde Eurocopter jáne Bell Helicopter TEXTRON zaýyttarynyń tikushaqtary bar.
