Tikushaq apaty: Kishi serjant Ashat Abdýlmanat sońǵy sýretin dostaryna jibergen
TALDYQORǴAN. QazAqparat - Qyzylordadaǵy tikushaq apatynda qaza tapqan kishi serjant Ashat Abdýlmanattyń otbasy Taldyqorǵanda páter jaldap turyp jatqan. Marqum saparǵa attanarda Kaspıı teńizi jaǵasynda sýretke túsip, dostaryna jibergen, dep habarlaıdy QazAqparat tilshisi.
Ashat Abdýlmanat 1982 jyly Shyǵys Qazaqstan oblysynyń Aqtoǵaı eldi-mekeninde týǵan.
Marqumnyń artynda anasy, jary jáne tórt balasy qaldy. 2010 jyly Taldyqorǵan qalasynan áskerge shaqyrylyp, odan keıin kelisimshart boıynsha áskerı qyzmetin jalǵastyrǵan. Qańtar aıynan bastap Aqtaý qalasyndaǵy 30153 áskerı bólimine aýysqan. Qala basshylary men aǵa býyn ókilderi marqumnyń otbasyna baryp, kóńil aıtyp shyqty. Taldyqorǵan ákimi Dastan Shaltabaev marqumdy aqtyq saparǵa shyǵaryp salý rásimine kómektesip, basqa da materıaldyq jaǵynan qoldaý kórsetiletinin aıtty.
Al Ashattyń týystary jesir qalǵan kelinshek pen 4 jetimniń baspana máselesin sheship berse degen tilegi bar.
«Bala-shaǵasy dalada qaldy. Balasynyń eń úlkeni 13 jasta, kishisi 3 jasta ǵana. Olar qazir eshqaısysy da uǵyp ta jatqan joq. Keıin óskennen keıin suraıtyn shyǵar ákem qaıda dep...», deıdi sarbazdyń aǵasy Káken Baımýrzın.
Eske sala ketsek, QR ІІM TJK baspasóz qyzmeti buǵan deıin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Qorǵanys mınıstrliginiń aqparatyna sáıkes, atalǵan tikushaq 4 birdeı áskerı tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaıy bólimshelerdiń «Altyn jebe» keshendi oqý jáne jattyǵý aıasynda qarańǵyda ári kúrdeli meteorologııalyq jaǵdaıda júrgizilgen.
Tikushaqta bolǵan 13 adam qaza tapty.
