Tikushaq apaty: Qaza bolǵan Danııar Qońyrbaıdyń artynda 3 balasy qaldy
AQTÓBE. QazAqparat - Qyzylordadaǵy ushaq apaty kezinde aqtóbelik Danııar Qońyrbaev kóz jumdy. Ákimdik otbasyna kómek kórsetedi, dep habarlaıdy QazAqparat tilshisi.
«Qyzylorda oblysynyń Jalaǵash aýdanynda bolǵan tikushaq apaty kezinde aqtóbelik Danııar Qońyrbaı qaza boldy. 33 jastaǵy maıordyń artynda úsh balasy qaldy.
«Danııar Qońyrbaıdyń úsh balasy bar, eń kishkentaıy 3 aılyq. Ata-anasy Muǵaljar aýdanynyń Qarakól aýylynda turady. Aqtóbe oblysynyń ákimi Ońdasyn Orazalınniń tapsyrmasymen Danııar Qońyrbaıdyń otbasyna kómek kórsetiledi», - dep habarlady oblys ákiminiń baspasóz qyzmeti.
Búgin T.Bıgeldınov atyndaǵy áýe qorǵanys kúshteri ınstıtýty arnaıy mıtıng ótkizdi. Sebebi, qaza bolǵan áskerı qyzmetkerler Aqtóbedegi joǵary oqý ornynyń túlekteri.
«Qorǵanys mınıstrligi qaza bolǵan adamdardyń otbasyna kóńil aıtady. Arnaıy mıtıng ótip, bir mınýt únsizdik jarııalandy», - dedi T.Bıgeldınov atyndaǵy áskerı áýe kúshteri ınstıtýtynyń basshysy Álı Ybyraev.
Eske sala ketsek, QR ІІM TJK baspasóz qyzmeti buǵan deıin Qyzylorda oblysynyń Jalaǵash aýdanynda MI-8 tikushaǵy apatqa ushyraǵanyn habarlaǵan bolatyn.
Qorǵanys mınıstrliginiń aqparatyna sáıkes, atalǵan tikushaq 4 birdeı áskerı tikushaq quramynan turatyn bólimmen birge Aqtaý qalasynan Shymkentke ushyp bara jatqan. Ushý sapary arnaıy bólimshelerdiń «Altyn jebe» keshendi oqý jáne jattyǵý aıasynda qarańǵyda ári kúrdeli meteorologııalyq jaǵdaıda júrgizilgen.
Tikushaqta bolǵan 13 adam qaza tapty.
