Tikushaq apaty: Kapıtan Syrym Másálim bala kezden ushqysh bolýdy armandaǵan
ORAL. QazAqparat - 27 naýryz kúni Qyzylorda oblysynda apatqa ushyraǵan MI-8 tikushaǵynyń ekıpaj quramynda batysqazaqstandyq kapıtan Syrym Másálim boldy, dep habarlaıdy QazAqparat tilshisi.
Syrym aýdany Araltóbe orta mektebiniń dırektory Beket Qabasovtyń aıtýynsha, Syrym Málkeıuly 1989 jyly 11 jeltoqsanda Araltóbe aýylynda dúnıege kelgen.
Bala kezden ushqysh bolýdy armandaǵan ol 2007 jyly mektep bitirgennen keıin Aqtóbe qalasyndaǵy T.Bıgeldınov atyndaǵy áýe qorǵanys kúshteri áskerı ınstıtýtyna oqýǵa tústi.
Instıtýtty 2011 jyly támamdaǵannan keıin Aqtaý qalasyndaǵy áskerı bólimde qyzmet atqardy. Marqumnyń artynda jary men úsh jasar uly qaldy. Ata-anasy Oral qalasynda turady.
«Syrym baısaldy edi. Kishkentaıynan sportqa beıim boldy. Kúres, voleıbolmen shuǵyldanatyn. Biz ony umytpaımyz. Mektepte de eske alý sharalaryn uıymdastyratyn bolamyz», dedi B.Qabasov.
Marqumnyń Oralda turyp jatqan ata-anasyna qala ákimi Murat Muqaev baryp, oblys basshysy atynan kóńil aıtty.
Oral qalasy ákiminiń baspasóz qyzmetinen túsken málimetke qaraǵanda, kapıtan Syrym Másálimniń jerleý sharalaryn ákimdik óz moınyna alatyn bolady.
Eske salaıyq, 27 naýryz kúni keshke Qyzylorda oblysynyń Jalaǵash aýdanynda MI-8 tikushaǵy apatqa ushyrady.Qorǵanys mınıstrliginiń aqparatyna sáıkes, atalǵan tikushaq Aqtaý qalasynan Shymkentke bet alǵan 4 áskerı tikushaq quramynda bolǵan. Barlyq ekıpaj múshesi - 13 adam qaza tapty.
Qorǵanys mınıstrligi qaza tapqan áskerı qyzmetshilerdiń esimderi men fotosýretterin jarııalady.
