Tikushaq apaty qalaı boldy - TJM nusqasy
«Keshe bizdiń júıe úshin qaıǵyly kún boldy. Bir kúnde biz tórt áriptesimizden – jaqyn dostarymyzdan, tájirıbeli jáne joǵary kásibı qyzmetkerlerimizden aıyryldyq. Sonymen qatar, avıatsııalyq oqıǵa kezinde bizdiń bir qyzmetkerimiz Qazavıaqutqarý jetekshi ınjeneri jáne QazTransOıl ókili zardap shekti.
Buǵan deıin habarlaǵanymyzdaı, keshe 23 aqpanda Astana ýaqytymen saǵat 15.48-de daǵdarys jaǵdaılarynda basqarý ortalyǵyna Oral qalasynan 54 km jerde Batys Qazaqstan oblysy Báıterek aýdany Chapýrıno kentiniń ashyq aýmaǵynda Mı-8 TJM Qazavıaqutqarý tikushaǵy qonýǵa májbúrli bolǵany týraly aqparat kelip tústi.
Tikushaq «Atyraý-Oral-Atyraý» baǵyty boıynsha ushqan bolatyn», - dedi ol vedomstvoda ótken brıfıngide.
Sondaı-aq, ol keshe 23 aqpan kúni saǵat 10.40-ta «QazTransOıl» AQ ótinimi boıynsha Atyraýdan ushyp shyqqanyn eske saldy.
«Bortta 6 adam - 5 ekıpaj múshesi jáne «QazTransOıl» AQ-nyń 1 ókili boldy.
«QazTransOıl» AQ-nyń ótinimi boıynsha tikushaq «Ózen-Atyraý-Samara» magıstraldyq munaı qubyryn boılaı ushty.
Saǵat 19.07-de oqıǵa ornynda TJD kúshimen qaza tapqandardyń 4 denesi tabyldy: áýe kemesiniń komandıri Dovletbaı Qanatov, ekinshi ushqysh Vladımır Afanasev, bort mehanıgi Sııazbek Andosov jáne ınjener Járdem Dosqalıev.
Qazavıaqutqarý ınjeneri Sergeı Şeglov pen «QazTransOıl» AQ jelilik qubyrjolshysy S.S. Erǵalıev túrli jaraqattarmen jedel medıtsınalyq járdem vagonymen Oral qalasynyń kópsalaly aýrýhanasyna jetkizildi.
Qazavıaqutqarý bas dırektory oqıǵa ornyna birden ushyp shyqty», - dedi TJM resmı ókili.
Eske salsaq, keshe Batys Qazaqstan oblysynda «Qazavıaqutqarý» AQ-ǵa tıesili tikushaqtyń «apatty jaǵdaıda qonyp», 4 adamnyń mert bolǵany habarlanǵan bolatyn.
Búgin tańerteń TJM Batys Qazaqstandaǵy oqys oqıǵadan qaza tapqandardyń aty-jónin jarııalady.
Foto: t.me/qr_tjm