Tikushaq apaty: Danııar Qońyrbaev on kún buryn áskerı ınstıtýtta biliktiligin jetildirgen
AQTÓBE. QazAqparat - Tikushaq apaty kezinde qaza bolǵan Danııar Qońyrbaev taıaýda ǵana týǵan jerine kelip, biliktiligin jetildirdi, dep habarlaıdy QazAqparat tilshisi.
Buǵan deıin habarlaǵanymyzdaı, tikushaq apaty kezinde qaza bolǵan 33 jastaǵy Danııar Qońyrbaevtyń úsh balasy bar, eń kenjesi 3 aılyq. Ata-atasy Muǵaljar aýdanynda turady.
Búgin qaza bolǵan áskerı qyzmetkerdiń denesi týǵan jerge jetti.
«Baýyrym on kún buryn ǵana Aqtóbege kelip, áskerı ınstıtýtta biliktiligin arttyrdy. Sol kezde týǵan-týystaryn aralap, óz josparymen de bólisti. Danııar áskerı akademııaǵa oqýǵa túsýdi armandaǵan bolatyn. Úsh aı buryn ǵana úshinshi balasy ómirge keldi», - dedi aǵasy Asqarbek Dáýletov.
Maıor Danııar Qońyrbaev mektep bitirip, 2003 jyly T.Bıgeldınov atyndaǵy áýe qorǵanys kúshteriniń áskerı ınstıtýtyna oqýǵa tústi. Oqý ornyn bitirgen soń Úsharalda, Taldyqorǵanda, Aqtaýda eńbek etti. Ol bala kezden ushqysh bolýdy armandaǵan eken.
«Biz tek saraptama qorytyndysyn kútemiz, - dedi aǵasy Asqarbek Dáýletov.
Eske salsaq, 27 naýryz kúni keshke Qyzylorda oblysynyń Jalaǵash aýdanynda MI-8 tikushaǵy apatqa ushyrady.
Barlyǵy 13 adam qaza boldy.
Qaza bolǵan áskerı qyzmetkerlerdiń denesi búgin jer qoınyna tapsyryldy.
