TikTok jelisinde nekege májbúrleý týraly jalǵan beınejazba salǵan áıel jazalandy

QONAEV. KAZINFORM — Almaty oblysynyń Qarasaı aýdanaralyq sotynda QR Ákimshilik quqyq buzýshylyq týraly kodeksiniń 456-2-babynyń 3-bóligi boıynsha K. esimdi áıelge qatysty ákimshilik is qaraldy.

Sot málimetinshe, ol 2026 jyldyń 15 qańtarynda TikTok jelisinde ózin urlap ketý faktisi bolǵany jóninde beınejazba jarııalaǵan.

— Atalǵan beınejazba áleýmettik jeli paraqshasynda taralyp, qyzdy májbúrlep nekege turǵyzý belgileri bar beınematerıal retinde usynylǵan. Sot otyrysynda K. óz kinásin tolyq moıyndap, beınejazbany kóp qaralym jınaý maqsatynda salǵanyn, jasaǵan áreketine ókinetinin túsindirdi, — dep habarlady sottan.

Sot qaýlysymen QR ÁQBtK-niń 456-2-babynyń 3-bóligi boıynsha kináli dep tanylyp, K.-ge 20 AEK mólsherinde ákimshilik aıyppul salyndy.

Eske salaıyq, buǵan deıin Konstıtýtsııada májbúrli nekege qarsy quqyqtyq negiz qalyptastyrylatynyn jazǵanbyz.