TikTok jasóspirimderdiń qaýipsizdigin qamtamasyz etý úshin jańa fýnktsııa qospaqshy
ASTANA. KAZINFORM – TikTok jasóspirimderdiń qaýipsizdigi men ál-aýqatyn qamtamasyz etý úshin jańa fýnktsııalardy iske qosady. Bul týraly QR Mádenıet jáne aqparat mınıstri Aıda Balaeva málim etti.
– TikTok jasóspirimderdiń qaýipsizdigi men ata-analardyń baqylaý júıesin odan ári jaqsartýda. Platforma jasóspirimder úshin qaýipsiz onlaın keńistik qurýǵa jáne ata-analarǵa balalarynyń TikTok-taǵy belsendiligin basqarýǵa kómektesetin jańa múmkindikterdi iske qosqanyn habarlaıdy. Atap aıtqanda, TikTok «Otbasylyq baptaýlar» bóliminde ata-analarǵa jasóspirimderdiń qosymshaǵa qoljetimdiligin belgili bir ýaqyt aralyǵynda shekteýge múmkindik beretin jańa fýnktsııany iske qosýdy josparlap otyr. Sondaı-aq, platforma saǵat 22.00-den keıin TikTok-ty paıdalanatyn jasóspirimderdiń nazaryn aýdaryp, tynyǵýyna kómektesetin jańa múmkindikti iske qospaq, – dep jazdy Aıda Balaeva.
«Otbasylyq baptaýlardyń» qosymsha fýnktsııalary
TikTok-taǵy ata-analardyń baqylaý júıesiniń bir bóligi bolyp tabylatyn «Otbasylyq baptaýlardyń» iske qosylǵanyna bes jyl boldy. Osy jyldar ishinde ata-analardyń keri baılanysy men sarapshylardyń usynystaryn eskere otyryp, TikTok jańa fýnktsııalardy birneshe ret eńgizip otyrdy.
Bul joly TikTok qoldanbasynyń ázirleýshileri «Demalys» degen jańa fýnktsııany qosty. Ol qosymshany belgili bir ýaqytqa buǵattaýǵa múmkindik beredi.
Endi ata-analar:
🔹Balalaryna TikTok-qa qol jetkizýdi shekteý ýaqytyn belgileı alady, mysaly, oqý ýaqytynda nemese túngi ýaqytta.
🔹Tsıfrly detokstqa qol jetkizý úshin qaıtalanatyn kesteni ornata alady. Shekteý qoıylǵan ýaqyt aralyǵynda jasóspirimniń TikTok-ty qoldaný suranysyn qabyldaı alady.
🔹Oǵan qosa «Otbasylyq baptaýlardyń» jańa fýnktsııasy ata-analarǵa balalarynyń akkaýnttary týraly tolyq aqparat alýǵa múmkindik beredi.
🔹Balalarynyń TikTok-ta kimderdi baqylap otyratynyn jáne olardyń akkaýntyna kimder jazylǵanyn kóre alady. Qandaı qoldanýshylardyń akkaýnttaryn buǵattaǵanyn bile alady. Tipti ata-analardyń baqylaýy qosylmaǵan kezde de, aldaǵy aılarda TikTok jasóspirimderge qaýymdastyq erejelerine sáıkes kelmeıtin kontent týraly ata-analaryna habarlaý múmkindigin qosýdy josparlap otyr.
Eske sala keteıik, buǵan deıin Oqý-aǵartý birinshi vıtse-mınıstri Natalıa Jumadildaeva elimizde TikTok-tyń balalarǵa áseri týraly pikir aıtqan bolatyn.