TikTok úshin trotýarǵa: Tarazda jol erejesin óreskel buzǵan júrgizýshi jaýapqa tartyldy
ASTANA. KAZINFORM – Áleýmettik jelilerge júrgizilgen monıtorıng barysynda Jambyl oblysynyń polıtsııa qyzmetkerleri jol qozǵalysy qaǵıdalaryn óreskel buzý deregin anyqtady, dep habarlaıdy Polisia.kz.
Jarııalanǵan beınejazbada Lada avtokóliginiń júrgizýshisi jaıaý júrginshilerge arnalǵan trotýarmen qozǵalyp, olardyń ómirine qaýip tóndirgeni kórinedi.
Tártip buzǵan azamattyń oblys ortalyǵynyń 20 jastaǵy turǵyny ekeni anyqtaldy. Belgili bolǵandaı, jas jigit kólik tizgininde otyryp, ermek úshin qaýipti áreketterge barǵan. Keıin túsirgen beınejazbalaryn TikTok áleýmettik jelisindegi paraqshasynda jarııalaǵan.
Atalǵan derek boıynsha júrgizýshi ákimshilik jaýapkershilikke tartyldy.
Polıtsııa trotýardyń jaıaý júrginshilerge arnalǵanyn eskertedi. Jol qozǵalysy qaǵıdalaryn elemeý orny tolmas qaıǵyly jaǵdaıǵa ákelýi múmkin.
Eske ala ketsek, buǵan deıiýn Tarazda bir vıdeonyń sońy sotpen aıaqtalǵanyn, ıaǵnı polıtseıge qatysty is qozǵalǵanyn jazdyq.