TikTok úsh aıdyń ishinde 189 mıllıonnan astam vıdeony óshirdi
ASTANA. KAZINFORM — TikTok 2025 jyldyń sáýir men maýsym aılary aralyǵynda qaýymdastyq erejelerin buzǵan 189 mıllıonnan astam vıdeony platformadan óshirgenin málimdedi, dep habarlaıdy Anadoly.
Kompanııa taratqan málimdemege sáıkes, TikTok osy kezeńge arnalǵan qaýymdastyq nusqaýlyqtarynyń oryndalýy týraly esepti jarııalady.
Esepke sáıkes, úsh aı ishinde 189 mıllıonnan astam vıdeo platformadan joıylǵan. Bul vıdeolardyń 99%-dan astamy qoldanýshylarǵa eskertilmesten, al 90%-dan astamy eshkim kórmeı turyp óshirilgen. Qoldanýshylar tarapynan shaǵym túsken kontenttiń 80,6%-y orta eseppen 2 saǵat ishinde platformadan alyndy.
Túrkııada osy kezeńde TikTok qaýymdastyq erejelerin buzǵan 4 431 182 vıdeony joıǵan. Bul kontenttiń 99,4%-y qoldanýshylardyń eskertýinsiz, al 97%-y 24 saǵatta óshirilgen.
TikTok-tyń kontentti baqylaý júıeleri tikeleı efırlerge de kúsheıtilgen baqylaý ornatqan. Jyldyń ekinshi toqsanynda qaýymdastyq erejelerin buzǵan 36 mıllıonnan astam tikeleı efır toqtatyldy. Bul aldyńǵy kezeńmen salystyrǵanda shamamen 100%-ǵa artyq jáne TikTok-tyń tsıfrlyq qaýipsizdik pen tikeleı efırlerdegi tártipti saqtaýǵa berik beıildiligin kórsetedi.
Jastardyń qaýipsizdigi — basty nazarda
Óshirilgen vıdeolardyń 30,6%-y — mazmuny jaǵynan ádepke saı emes, al 30,5%-y — jarnama nemese saýda maqsatyndaǵy beınematerıaldar bolǵan.
Sonymen qatar, jasóspirimderdiń tsıfrlyq qaýipsizdigin qamtamasyz etýge baǵyttalǵan saıasat aıasynda óshirilgen kontenttiń 94,4%-y eshkim kórip úlgermeı turyp joıylǵan.
13 jasqa tolmaǵan qoldanýshylarǵa arnalǵan shekteýler aıasynda 25 mıllıonnan astam akkaýnt qaýymdastyq erejelerin buzǵany úshin buǵattaldy.
Sáýir men maýsym aralyǵynda jarnama saıasatyn buzǵan qoldanýshylarǵa júrgizilgen tekserýler nátıjesinde 8 mıllıonnan astam materıal platformadan alyndy. Ereje buzýshylyqtardyń basym bóligi akkaýnt deńgeıinde qabyldanǵan sharalardyń nátıjesinde anyqtalǵan.
Budan buryn TikTok-tyń bas kompanııasy ByteDance Eýropa qoldanýshylarynyń jeke derekterin Qytaıǵa zańsyz jibergeni úshin 500 mln eýrodan astam aıyppulǵa tartylýy múmkin ekeni habarlandy.