TikTok Ulybrıtanııadaǵy júzdegen moderatordy jasandy ıntellektimen almastyrýy múmkin

ASTANA. KAZINFORM – Qytaıdyń ByteDance kompanııasyna tıesili TikTok áleýmettik jelisi kontent moderatsııalaıtyn jáne platforma qaýipsizdigin qamtamasyz etetin Ulybrıtanııadaǵy bólimshesiniń júzdegen qyzmetkerin jumystan shyǵarýy múmkin, dep habarlaıdy Financial Times.

Bul bólimsheniń qyzmetkerleri basshylyqtan kompanııa budan bylaı Londonnan moderatsııa júrgizbeıtini týraly hat aldy. Brıtanııalyq kommýnıkatsııa qyzmetkerleri kásipodaǵynyń baǵalaýy boıynsha, kompanııanyń Londondaǵy bólimshesinde 300-ge jýyq adam jumys isteıdi jáne olardyń kópshiligi jumystan bosatylýy múmkin.

Moderatsııa ishinara jumys kúshi arzan basqa elderge, sonyń ishinde Dýblın nemese Lıssabondaǵy bólimshelerge aýystyrylady jáne ishinara AI júzege asyrady.

– Tehnologııalyq ınnovatsııalar, sonyń ishinde úlken tildik modelderdi damytý bizdiń kózqarasymyzdy ózgertedi, - delingen hatta.

Jaqynda Ulybrıtanııada Internet qaýipsizdigi týraly zań kúshine endi, onyń ishinde platforma paıdalanýshylardyń jasyn tekserýdi jáne 18 jasqa tolmaǵan adamdar úshin yqtımal qaýipti kontentti shekteýdi talap etedi.

TikTok bul múmkindikti ótken aıda engizdi jáne kompanııa bolashaqta jasty anyqtaý úshin paıdalanýshynyń áreketin taldaı alatyn AI quraldaryn paıdalanýdy josparlap otyr.

Eske sala keteıik, Germanııada 16 jasqa deıingi balalarǵa TikTok pen Instagram-ǵa tyıym salý usynyldy.