TikTok trendteri endi sózdikte: Cambridge 6 myń jańa sóz qosty

ASTANA. KAZINFORM — Cambridge sózdigine TikTok-tan shyqqan «delulu», «tradwife», «skibidi» sekildi jasóspirimder slengi engizildi, dep jazady DW.

Aǵylshyn tilindegi eń bedeldi sózdikterdiń biri — Cambridge Dictionary — bıylǵy onlaın-nusqasyna 6 myń jańa sóz qosty. Olardyń arasynda TikTok jelisinen taralǵan jasóspirimder slengi de bar. Atap aıtqanda: tradwife («dástúrli áıel»), delulu («eleske senetin»), mouse jiggler («tyshqan qozǵaltqyshy») jáne skibidi (maǵynasy ártúrli bolýy múmkin: «keremet» nemese «nashar»).

Tradwife sózi otbasynda óz erkimen dástúrli genderlik rólderdi atqaratyn áıeldi sıpattaıdy — mysaly, úı sharýasymen aınalysyp, bala tárbıeleıdi. Sońǵy ýaqytta mundaı áıelder jaıly vıdeoblogtar TikTok pen basqa da platformalarda keń tanymal bola bastady.

Delulu — jastar arasynda jalǵan nemese shyndyqqa janaspaıtyn nársege senetin adamdy nemese sol senimniń ózin bildiredi. Bul sóz aǵylshyn tilindegi «delusional» (elestegi, shyndyqtan ada) degen sózden shyqqan.

Mouse jiggler — qashyqtan jumys isteıtinder qoldanatyn baǵdarlamalar. Olar kompıýterdiń tyshqanyn avtomatty túrde qozǵaltyp turady. Bul qurylǵy nemese baǵdarlama kompıýterdiń uıqy rejımine ótpeýine kómektesip, adamnyń jumys istep otyrǵandaı áser qaldyrýyna múmkindik beredi.

Al skibidi sózi — 3D-anımator Alekseı Gerasımov jasaǵan Skibidi Toilet veb-serıalynan keıin keń taralǵan. Onda ýnıtaz deneli, adam basty fantastıkalyq jaratylystar beınelenedi. 

Kembrıdj sózdiginiń ókilderi bul sózderdiń endi tilde ornyǵyp, turaqty qoldanylatyn termınderge aınalady dep úmittenedi. Sebebi sózdikke tek shyn máninde qoldanysqa enip ketken neologızmder ǵana qosylady.

Buǵan deıin Germanııada 16 jasqa deıingi balalarǵa TikTok pen Instagram-ǵa tyıym salý usynylǵanyn habarlaǵan edik.