TikTok tanymal tulǵalardyń beınesi qoldanylǵan dıpfeıkterdi anyqtaıtyn fýnktsııany iske qosty

ASTANA. KAZINFORM — TikTok áleýmettik jelisi tanymal tulǵalarǵa óz beınesin paıdalanyp, jasandy ıntellekt kómegimen jasalǵan kontentti anyqtaýǵa múmkindik beretin Likeness Detection jańa fýnktsııasyn kezeń-kezeńimen iske qosa bastady. Bul týraly Euronews jazdy.

TikTok
Foto: Euronews

Jańa qural eń áýeli saıasatkerlerge, memlekettik organdar ókilderine jáne saıası partııalarǵa arnalǵan. Ol adamnyń kelisiminsiz onyń syrtqy kelbetin paıdalanyp, jasandy ıntellekt arqyly jasalǵan sýretter men vıdeolardy anyqtaýǵa kómektesedi.

Fýnktsııany qosý úshin paıdalanýshylar úshinshi tarap seriktesi arqyly jeke basyn rastaýy kerek. Osydan keıin júıe olardyń beınesi paıdalanylýy múmkin jarııalanymdar men akkaýnttar týraly habarlama jiberip otyrady.

Osyndaı materıaldar anyqtalǵan jaǵdaıda, paıdalanýshylar TikTok qaýipsizdik qyzmetine tikeleı shaǵym joldap, olardy tekserýge ótinish bere alady.

Bul fýnktsııa Eýropada jalǵan aqparat pen dıpfeıkterdiń taralýy kúsheıgen tusta, sonyń ishinde saılaý naýqandary kezinde iske qosylyp otyr.

Sonymen qatar TikTok Identify AI-Generated Content atty tegin quraldy tanystyrdy. Ol sýretterdiń, vıdeolardyń jáne aýdıojazbalardyń ByteDance kompanııasynyń CapCut, Dreamina, Hypic jáne Pippit sııaqty servısteri arqyly jasalǵanyn nemese óńdelgenin tekserýge múmkindik beredi.

Servıs faıldardyń metaderekteri men kózge kórinbeıtin tsıfrlyq sýtańbalardy taldaıdy. Tekserý qyzmetin TikTok akkaýnty joq paıdalanýshylar da qoldana alady.

Alaıda kompanııa bul qural TikTok pen ByteDance-tiń óz tehnologııalary arqyly jasalǵan nemese óńdelgen materıaldardy ǵana anyqtaı alatynyn eskertti. Sondyqtan jasandy ıntellekt jasaǵan barlyq kontentti tabýǵa kepildik bermeıdi.

Kompanııanyń málimetinshe, tekserýge júktelgen faıldar taldaý aıaqtalǵannan keıin birden óshiriledi jáne jasandy ıntellekt modelderin oqytýǵa paıdalanylmaıdy.

Eske salaıyq, buǵan deıin Qazaqstanda úsh aıda 1,37 mıllıon TikTok vıdeosy óshirilgenin habarlaǵan edik.