Qaraǵandyda TikTok-taǵy áreketi úshin 56 jastaǵy strımer 10 táýlikke qamaldy
ASTANA. KAZINFORM — TikTok-taǵy kontenti úshin qaraǵandylyq strımer jaýapqa tartyldy, dep habarlaıdy QR ІІM baspasóz qyzmeti.
Qaraǵandy oblysynda polıtsııa qyzmetkerleri ınternet keńistigine júrgizilgen monıtorıng barysynda TikTok áleýmettik jelisinde 56 jastaǵy strımerdiń qoǵamda teris pikir qalyptastyratyn jáne zań talaptaryna qaıshy áreketterin anyqtady.
Qaraǵandy qalasynyń turǵyny Erken Jantykpaev TikTok áleýmettik jelisindegi belsendiligimen tanymal. Ol áıelder kıimin kıip, quqyqqa qaıshy mazmundaǵy beınematerıaldar jarııalaǵan. Atalǵan derek boıynsha polıtsııa tarapynan tıisti sharalar qabyldandy.
Sot qaýlysymen azamatqa 10 táýlik ákimshilik qamaý jazasy taǵaıyndalyp, resmı eskertý jasaldy. Polıtsııa qyzmetkerleri azamattyń áreketi zań talaptary men qoǵamdyq tártipke qaıshy keletinin atap ótti. Mundaı áreketterge quqyqtyq baǵa berilip, zańnamada kózdelgen jaýapkershilik sharalary qoldanylady.
— Qazir Erken Jantykpaev áleýmettik jelilerdegi akkaýnttaryn joıǵan. Sonymen qatar polıtsııa tarapynan oǵan qatysty baqylaý jalǵasyp jatyr. Eskertý talaptaryn qaıta buzǵan jaǵdaıda, qoldanystaǵy zańnamaǵa sáıkes neǵurlym qatań jaýapkershilik qarastyrylýy múmkin, — deıdi tártip saqshylary.
Polıtsııa azamattardy áleýmettik jelilerdi paıdalaný kezinde qoldanystaǵy zańnama talaptaryn saqtaýǵa, qoǵamdyq tártipke qaıshy jáne quqyqqa syıymsyz kontent taratpaýǵa shaqyrady.
Budan buryn TikTok-taǵy áreketi úshin qazaqstandyq strımer psıhıkalyq densaýlyq ortalyǵyna jatqyzylǵany belgili boldy.
