TikTok-taǵy balaǵat sóz: Shymkentte tórt bloger qamaýǵa alyndy
ShYMKENT. KAZINFORM — Shymkentte TikTok áleýmettik jelisinde tikeleı efır kezinde balaǵat sózder aıtqan tórt bloger ákimshilik jaýapkershilikke tartyldy.
Shymkent qalasy polıtsııa departamentiniń málimetinshe, quqyq buzýshylyq áleýmettik jelilerge júrgizilgen monıtorıng barysynda anyqtaldy. Tikeleı efırge qatysýshylar qoǵamdyq tártipti buzyp, bylapyt sózder aıtqan. Keıin olardyń Shymkenttegi jaldamaly páterde bolǵany naqtylandy.
Quqyq buzýshylyq jasaǵandardyń qatarynda jelide «Belyı tıgr» laqap atymen belgili 31 jastaǵy túrkistandyq Beksultan Appaz, «Sampo» laqap atymen tanylǵan 22 jastaǵy qyzylordalyq Samat Ámir, 25 jastaǵy mańǵystaýlyq Nurgazy Joldas jáne 26 jastaǵy túrkistandyq Erasyl Jumaǵul bar.
— Tórteýi de ákimshilik jaýapkershilikke tartyldy. Sot sheshimimen Beksultan Appaz 17 táýlikke, Samat Ámir 5 táýlikke, Nurgazy Joldas 7 táýlikke, al Erasyl Jumaǵul 5 táýlikke qamaýǵa alyndy, — delingen vedomstvo habarlamasynda.
Polıtsııa qaralym men aýdıtorııa jınaý maqsatynda zańǵa qaıshy áreketterdi kópshilik aldynda jasaý jaýapkershilikten bosatpaıtynyn, mundaı árbir faktige quqyqtyq baǵa beriletinin eskertti.
Buǵan deıin Qyzylordada TikTok-ta taraǵan vıdeoda mysyqqa qatygezdik kórsetken er adamnyń jazalanǵanyn habarlaǵan edik.
